明年台灣總統大選是台灣中國的大對決!
Written by 李南衡   
Wednesday, 19 June 2019

六月十三中晝,民進黨總統初選結果,發表確定由蔡英文總統代表民進黨競選明年總統。初選期間的風聲、雨聲攏總過去ah。初選競選對手行政院前院長賴清德講,民進黨初選應該作一個結束,呼籲團結支持蔡英文總統連任,che tio̍h是風度。蔡英文總統講:台灣使輸,團結才會嬴。

2020年台灣總統大選是台灣中國的大對決,代表台灣chit旁的是現任總統民進黨的蔡英文,代表中國hit旁的可能是中國國民黨的韓國輸、抑是中國國民黨的郭台銘、kah家己講是白色力量的台北市長柯文哲三個人。   

高雄市長韓國瑜2019年三月二二、二三日前後進入香港、澳門中聯辦,會見兩處的主任,三月二五轉往深圳見國台辦主任劉結一,韓國瑜講:「我強烈支持九二共識。」韓國瑜應該知影中聯辦是香港kah澳門地區的太上皇、mā是港澳地區實施一國兩制的監督主管。今年正月初二,中國國家主席習近平提出「一國兩制台灣方案」,蔡英文總隨時kā彈倒轉去講:阮自了m̄-bat接受『九二共識』,臺灣絕對bē接受『一國兩制』,絕大多數臺灣民意mā堅決反對『一國兩制』,che mā是『臺灣共識』。」咱看chit幾工香港103萬人出來遊行抗議的《反送中》,tio̍h知影無hit號啥物「一國兩治」,明明是北京「全面管治」。韓國瑜的行為tio̍h是向中國交心,贊成中國來台灣實施現此時香港式的「一國兩制」。   

鴻海董事長郭台銘積極teh爭取中國國民黨提名作明年總統候選人,香港《反送中》活動,郭台銘講:「香港一國兩制是失敗的。」雖然按呢,郭台銘大部分的企業kah財產攏佇中國,佇中國有一百外萬的員工,佇伊的工廠內底有設中國共產黨黨部。伊若當選台灣總統,伊佇中國的事業財產kah伊作總統的身分若有衝突的時,伊beh按怎處理?莫怪真濟台灣人bē放心會煩惱。   

台北市長柯文哲講「兩岸一家親」,伊想講無人知影che是中國國家主席習近平所喝出來的,而且是對台灣的基本定調。Hông罵,柯文哲辯講好的tio̍h愛堅持。中美貿易談判無成果,美國Trump總統起性地,宣布加進口稅,美國一年tio̍h會tàng加收入美金一千億。Trump總統罵講ùi 2,000年中國加入WTO以來,每年kā美國偷the̍h足濟錢。Hō͘咱想起今年一月柯文哲講一個強盜的比喻,伊講台灣蔡英文政府向美國爭取資源,那像teh搶銀行(美國),干單看tio̍h錢,卻無看tio̍h徛佇邊仔的警察(中國)。chit種phô͘中國尻川phô͘ kah chiah呢bē見笑的柯文哲,聽講有想beh選台灣總統。伊當然是列佇中國hit旁。   

台灣的蔡英文,那會使拚輸中國的代理人?台灣人tio̍h團結,團結誠有力!