作市長是kah市民訂契約!
Written by 李南衡   
Wednesday, 26 June 2019

 《遠見雜誌》2019年縣市長施政滿意度調查結果出爐,桃園市長鄭文燦、新竹市長林智堅兩位第三遍hông封作五星首長。桃園市長鄭文燦的滿意度77.7%是全台灣上懸的縣市首長。前幾工,鄭文燦市長接受三立電視台《前進新台灣》節目主持人林楚茵小姐專訪,問伊敢有可能作蔡英文總統chit遍競選的副手-副總統候選人?鄭文燦市長應講,我一定tio̍h四年桃園市長作好作滿。主持人問伊,是按怎tio̍h堅持四年作好作滿,若有khah好的機會敢beh去爭取?鄭市長應講:我想。因為桃園市民選我作市長,我宣誓就任市長tio̍hkah市民拍契約,一定tio̍h照呼照行守信用。

 

六月十九,高雄市長韓國瑜kah模範生以及市長賞畢業生作夥翕相,一名國中應屆畢業的查埔模範生當面對韓市長講,伊beh選總統這件代誌,實在是太好笑!事後媒體訪問hit位同學,伊講希望韓市長m̄-thang hō͘伊的感性壓過理性。   

就任高雄市長無半年的韓國瑜,tio̍h想beh棄捒高雄市民去選總統。伊真正m̄知宣誓就任高雄市長tio̍h是kah高雄市民拍契約?韓國瑜市長拍契約的對象m̄是干單選伊作市長的八十九萬兩千五百四十五個市民,是全高雄市兩百七十七萬三千0二十六個市民。韓國瑜市長若是真正反悔作高雄市長,認為伊實在是khah合意作台灣總統,應該下決心去選台灣總統,總統以外啥物to̍h無愛,先kā高雄市民會一個失禮、辭掉高雄市長,專心去選台灣總統,mā才bē hông罵講是「放屎無碇」的落(làu)屎馬!   

一個bē見笑嫌無夠,兩個bē見笑掠來鬥。台北市長柯文哲teh笑高雄市長韓國瑜kah台北市議員王世堅是「哥俩好」,因為韓市長學王議員講“over my dead body”。其實真正「哥俩好」是柯文哲市長kah韓國瑜市長,一北一南,兩個院轄市長攏是「食碗內看碗外」,想beh選台灣總統koh m̄甘放掉現時的市長寶座。   

可能有人會講台北市長柯文哲比高雄市長韓國瑜khah好,至少柯市長已經作過一任ah!錯,錯了!咱講宣誓作市長是kah市民訂契約。柯文哲市長頂一任市長m̄是kah選伊作市長的八十五萬三千九百八十三個市民訂契約,是kah當時兩百七十萬四千八百十個台北市民訂契約;Chit任的台北市長m̄是kah選伊作市長的五十八萬0六百六十三個市民訂契約,是kah宣誓當時兩百七十七萬三千0二十六個台北市民訂契約。台北市長柯文哲kah高雄市長韓國瑜仝款選總統「太好笑」,市長作半年tio̍h想beh選台灣總統koh m̄甘放掉現時的市長寶座。   

Chit種無照契約行的市長,講beh選總統,你敢敢(kám-káⁿ)信伊!