蔡英文總統過境美國,中國放啥砲!
Written by 李南衡   
Wednesday, 24 July 2019

 七月十一中晝,蔡英文總統啟程前往加勒比海四個友邦,展開十二工、十一暝的「自由民主永續之旅」,去程會佇美國紐約過境過兩工、回程會佇美國展茂(Denver)過境兩工。舊年美國通過《台灣旅行法》,台美雙方的高層會tàng正式來往訪問。以前,咱的總統過境美國干單會tàng停留一暝,而且使有任何公開活動,限制真濟。Chit遍蔡英文總統預定過境美國四暝,kah以前完全無仝。預定佇紐約停留期間,有beh佇咱駐紐約辦事處出席十七個友邦駐聯合國代表的歡迎酒會、有beh去哥倫比亞大學kah學者舉行閉門對談、kah桃園市長鄭文燦作夥主持台美企業高峰會等活動。

七月十一,中國外交部發言人耿爽佇例行記者會頂面,呼籲美國mài hō͘蔡英文過境,停止美台官方往来。七月十二,仝chit-ê發言人耿爽敦促美國m̄-thang為tio̍h蔡英文的「台獨」分裂勢力宣揚「台獨」主張提供任何平台。仝一工,中國國台辦發言人馬曉光mā抨擊講,che是蔡英文「企圖借外部勢力挑戰一個中國原則,嚴重破壞台海和平kah穩定。」仝一工,中國國務委員兼外交部長王毅,佇布達佩斯kah匈牙利外交部長西雅爾多共同會見記者的時mā講,中國對蔡英文過境美國表示嚴重關切,堅决反對美台進行任何形式的官方接觸。咱聽tio̍h cho̍p-cho̍p叫誠無好聽的聲,tio̍h是中國官員teh拍嘴砲的聲音。   

拍嘴砲以外,中國mā會曉拍真正的砲。七月十四,中國國防部官網發布訊息講:「中國人民解放軍tī近日beh佇東南沿海等海空域演習。咱總統府隨時提醒中國,維持兩岸kah區域間的和平穩定、確保人民福祉,是包括兩岸在內區域各方的共同責任kah目標。作為國際社會的成員,任何升懸軍事態勢,可能會對區域安全穩定kah兩岸關係造成衝擊傷害,攏m̄是國際社會愛看見的。仝一工,咱國防部講,三軍統帥無佇厝裡mā m̄驚!對共軍相關的演訓動態,咱國軍攏會tàng有效掌握kah應對處理,確保國家安全。  

 七月十四,蔡英文總統當teh出訪加勒比海友邦的時,聽tio̍h中國國防部宣布,中國人民解放軍,近日中beh佇東南沿海海空領域進行軍事演習。對時機chiah呢敏感的chit-ê軍事演習,蔡英文總統受訪問的時表示,照伊的瞭解che是例行性軍事演習,「但是已經演變作我逐遍出訪的例行性演習」。好得咱的國軍攏有全程的掌握,咱對chit項代誌非常謹慎teh處理。  

 Chiah抵好,逐遍蔡英文總統出訪友邦,中國tio̍h軍事演習,那像teh kā蔡總統放歡迎國賓禮砲,敢有放十二響?Chit-ê中國厝邊實在傷厚禮數,後擺免按呢。