柯文哲市長tio̍h是chit種腳數!
Written by 李南衡   
Tuesday, 13 August 2019

  柯文哲講伊家己是:台大醫學院醫科畢業的neh、智商(IQ157228事件受難者的後代、深綠的,超越藍綠的白色力量。若當選台北市長,一定beh刣台北市的五大弊案。真濟人想講:台北市長無選伊behsiáng?等伊作了市長,講是「兩岸一家親」,台北市五大弊案連摸mā m̄敢去摸,照姚文智講,柯文哲處理五大弊案攏是「先大罵,才密會,最後輕輕仔放掉。」有人叫伊「檳榔柯A」原來是講伊外表是綠的,內底是白的,食了歸嘴是紅的。有人講柯文哲,像義大利國旗,起先三分之一是綠色,中央三分之一是白的,後壁三分之一是紅的。

柯文哲市長上驚無歸陣記者tòe依後壁、電視報紙雜誌無伊的新聞、網路頂面無人討論伊。若無beh按怎?製造新聞。新聞tio̍h製造愈大條愈會響,那像烏道的m̄成囝仔,beh出頭beh出名tio̍h刣家己的老大、抑是對手的老大。現此時台灣的老大tio̍h是蔡英文總統,當然tio̍h刣伊,問題是柯市長一時chhōe無蔡英文總統的弱點、施政的缺失thang下手,只好想辦法kā蔡英文總統洗面,講你那會kā國家舞kah chit款。你無貪污,但是你邊仔的每一個人攏總貪污!  

 第一,柯文哲市長罵蔡英文總統「你那會kā國家舞kah chit款,」咱實在m̄知伊是講叼一款?是講kā台灣舞kah明年會變作亞洲四小龍經濟成長率第一名?抑是講kā台灣舞kah明年的政府總預算是二十二年來第一遍預算平衡,二十二年來每年政府總預算攏是紅字預算。政府舞kah叼一款柯市長你才會滿意?  

 第二,柯文哲市長想beh hō͘蔡英文總統歹看,beh kā蔡英文總統洗面。無想tio̍h洗面洗無tio̍h煞去礙tio̍h鼻。伊講(蔡英文總統)你無貪污,但是你邊仔的每一個人攏總貪污!總統府正式聲明反駁斥責講,貪污的指責是足嚴重的代誌,若無證據柯市長應該公開向社會道歉。總統府發言人林鶴明早前作過柯市府的發言人,伊講,柯市長應該向我kah真濟無代無誌hông指責貪污的人道歉。有媒體問柯市長敢有beh kâng會失禮?柯市長應講,我beh會啥物失禮!有可能指責伊的人傷過濟,第二工,柯市長反口供講伊有失言。但是伊無beh為tio̍h伊烏白講話來kâng會失禮。伊講我柯文哲講話tio̍h是按呢,歡喜無歡喜隨在你。Che明明是烏道的m̄成囝仔teh學大尾鱸鰻講話的氣口。   

上súi氣的是蔡英文總統,佇伊的面冊頂面,用2014年柯文哲佇面冊所講的話來塞柯文哲的嘴:「批評別人bē hō͘家己變好,抹烏別人bē hō͘家己變清氣,負面攻擊bē hō͘選舉向正面提升。」

 Ai,柯文哲市長tio̍h是chit種腳數!