何杲(kó)先生何等旳氣魄!
Written by 李南衡   
Wednesday, 04 September 2019

八月二八台灣《自由時報》報導,香港「反送中」抗爭ùi六月到taⁿ,爆發真濟遍警民衝突。香港警方今仔日表示,前後攏總有掠將近900人。香港「反送中」示威者kah警方的衝突,是針對修訂《逃犯條例》的抗議,因為chit-ê條例修訂了後,會允准香港政府犯罪的嫌犯引渡去中國,逐個攏知影佇中國的法院是由共產黨控制的,無法無天。

反送中網民發起八月初五「三罷」,也tio̍h是罷工、罷市、罷課,要求香港政府回應早前提出的「五大訴求」。示威者早起發動「不合作運動」癱瘓交通,香港機場mā取消bē少的航班,香港行政長官林鄭月娥舉行記者會表示,少數極端暴力者的行為已經hō͘政治訴求變質。   

七月底,國泰航空有一名飛行員佇香港hông掠去、hông控告犯tio̍h擾亂罪以後,chit間公司tio̍h成作中國憤怒的目標。Tī短短幾工內,國泰航空開始對員工的行為發出無仝的信號。八月初七,國泰航空公司主席史樂山(John Slosar)佇記者招待會頂面講,員工的政治觀點m̄是公司tio̍h煩惱的。「阮當然bē認為應該tio̍h kā in講,對某一項代誌tio̍h按怎想,」伊講:「In攏是大人ah。In攏是服務專業人士。阮真尊重in。」一禮拜內,國泰航空已經解僱四名員工,因為in有插tio̍h kah示威活動有關的不當行為。行政總裁(CEO)何杲(Rupert Hogg)有警告員工m̄-thang參加無經過香港當局批准的抗議活動。  

 一間國有的中國國際航空公司是國泰航空的大股東,對國泰航空下令,禁止hiah-ê「參與kah支持非法遊行示威、暴力衝擊活動,以及有過激行為」的員工,做任何牽涉kah飛往中國大陸航班的工作。而且要求國泰航空向當局提交所有飛往中國大陸、抑是飛越中國上空的機組人員的資料,才會tàng kā in批准。  

 八月十六下晡,傳出國泰航空行政總裁何杲kah顧客商務總裁盧家培雙雙「hông辭職」的消息,真濟人攏感覺真意外。前無偌久中國民航局要求行政總裁何杲,tio̍h kā響應反送中罷工的員工名單交出來,何杲應要求tio̍h kā名單交出去,名單頂面干單一個人名tio̍h是「何杲」本人。伊表明家己tio̍h為員工罷工chit件代誌來負責,無beh出賣任何一位員工!   

Chit位佇國泰航空工作三十外年的何杲,1986年開始佇國泰航空拍拚,兩年前才升任國泰航空行政總裁,那有可能無寶惜家己的工作咧?國泰般空公司頂頂下下的員工,心懷感激,內心攏講:何杲先生,阮永遠會會記得你的名。

佇台灣雖然大部分的人m̄-bat何杲先生,但是伊的氣魄,值得咱尊敬!