比蜜婆「不禽不獸」koh khah害的柯文哲!
Written by 李南衡   
Thursday, 12 September 2019

  新聞報導,台北市長柯文哲頂日有講,九月十七以後,若是鴻海創辦人郭台銘無去登記,tio̍h干單chhun一條路,伊會去kah親民黨主席宋楚瑜參詳,「看伊有beh提名我抑無」。有消息傳出講,宋楚瑜原本有柑仔色kah白色合組聯盟的想法,做夥推出立法委員參選人,親民黨會使推柯P出來選總統。但是最後因為柯P起柑仔營真火to̍h,親民黨主席宋楚瑜甚至一時想beh辭掉「台北市政府首席市政顧問」來表示抗議。

親民黨手底有提名總統候選人的「入場券」,宋楚瑜參選的態度一直是保留,原本有意beh kā「入場券」the̍h hō͘柯文哲,柑仔陣營kah白陣營合組聯盟,前提是柯文哲bē使組黨,按呢才bē去衝擊tio̍h親民黨的政黨票。意思真清楚,tio̍h是親民黨扶柯文哲作雞母,chhōa親民黨kah柯文哲家己的雞仔子選立委。無疑誤八月初柯文哲宣布成立「台灣民眾黨」。宋楚瑜kah柯文哲有約在先,所以hit當時有親民黨的人提醒柯文哲,beh組黨那會無事先kah宋楚瑜先講一聲?柯文哲霸氣應講,我組黨是按怎tio̍h向啥人報告?而且「台灣民眾黨」成立hit工有兩位親民黨台北市議員在場,其中一位議員的查某子koh擔任「台灣民眾黨」發言人,莫怪親民黨主席宋楚瑜會氣kah大聲講:出去的黨員免koh轉來!  

柯文哲算盤真gâu拍,kah散phí-phí的親民黨合(kap)無啥路屎,目睭前一個好額人郭台銘無緊倚過去khîⁿ hō͘ tiâu那會使得?一聲tio̍h kā宋楚瑜踢去邊仔;M̄-nā按呢,早前一直幫忙柯文哲、佇伊的電視報紙大大捧場柯文哲的「旺中集團」蔡衍明,因為kah郭台銘有khê孔,互相對罵,柯文哲mā隨時變一個面,kah人罵摻落去,罵人是「紅色媒體」!蔡衍明那是普通人?伊開直播一工講一條柯文哲kah國台辦、kah伊蔡衍明過去的關係,揭起來臭mo-mo。   

禽鳥teh聚集開會,蜜婆走去參加,眾禽鳥質疑伊的身分,伊辯解講伊會飛當然屬佇禽鳥類;獸類聚集開會,蜜婆mā走去參加,眾獸質疑伊的身分,伊解說講伊kah各位仝款用奶飼囝仔,當然是屬佇獸類。有禽鳥mā有獸類罵蜜婆是「不禽不獸」,蜜婆面皮真厚講伊家己是「也禽也獸」。   

柯文哲原本講伊是深綠的,才koh改講伊是白色,倚「旺中集團」聽蔡衍明的話,傳講中國國家主席習近平的聖旨「兩岸一家親」,歸身軀紅phā-phā,中國國民黨榮譽黨員郭台銘是藍的,柯文哲khîⁿ tiâu-tiâu假那beh變藍的;柯文哲若家己beh選總統,tio̍h拜託親民黨宋楚瑜kā提名,koh會變作柑仔色。   

按呢,柯文哲敢m̄是比蜜婆的「不禽不獸」koh khah害?