柯文哲市長假睏,叫bē精神!
Written by 李南衡   
Saturday, 05 October 2019
 假使今年有舉辦「全國十大hàm古比賽」,相信中華統一促進黨佇台北車頭舉辦「中國十一國慶大會」chit條,應該入選。咱攏知,一個hàm古會tàng變作一個大hàm古,不是靠一兩個hàm代誌無意中抵tio̍h合作夥的,是由一大綰hàm代誌一個黏一個才完成的。

警方對外講,九月二六,中華統一促進黨原本以「慶祝光輝十月廟會民俗活動」作理由,向警方申請佇台北車頭南二門廣場進行四工的遊行,但是警方認為台北車頭是三鐵共構的交通關鍵的所在,恐驚會影響tio̍h來來去去的旅客通行、造成交通不便,所以駁回申請。照集會遊行法第八條規定,「室外集會、遊行,應向主管機關申請許可,但是宗教、民俗、婚、喪、喜、慶活動不在此限。」 意思真明,tio̍h是講,中華統一促進黨早早tī九月二六申請集會遊行,警方駁回無准in,但是in若用宗教、民俗的名義,免申請而且阮警方無法伊!   

警方chit種講法大錯特錯。In申請的時,kah九月二八hit早起,中華統一促進黨總裁張安樂佇面冊發文講,中央黨部舉辦慶祝光輝十月活動,十月初一下晡兩點會佇台北車頭南二門廣場集合,活動會ùi兩點半開始到四點半結束。警方早tio̍h已經知影有關的「人」-中華統一促進黨,「地」-台北車頭南二門廣場,「時」-十月初一,「事」-慶祝中國十一國慶。完全掌握應該真好處理才tio̍h,奇怪的是事實上表現出來的是一個散phún-phún的台北市政府。   

Hit早起,張安樂tio̍h叫人佇台北車頭南二門廣場搭舞台,市警察局早tio̍h知影,應該通知公園處抑是違建課來處理,會使隨時阻止抑是拆掉,一直到下晡兩點慶祝會開始,一大堆警察圍teh看,將近五百名該黨的成員陸續到位,下晡三點二八分,中華統一促進黨總裁張安樂才到現場,上台演講。管區的中正一分局局長沈炳信夯牌警告,命令群眾解散,有成千名的警察佇四箍圍警備,完全浪費警力。但是張安樂無插伊、繼續演講,下晡三點四十九分第四遍夯牌警告。配合了誠抵好,張安樂演講抵抵結束。事後公園處才依照違反臺北市公園管理自治條例第13條14款「公園內不得有下列行為:擅自營火、野炊、夜宿、燃放鞭炮或搭設棚、帳。」罰處新台幣2,400元,而且要求隨時拆除舞台設施。笑死人!罰kah 2,400元咧?中華統一促進黨若kā歸場慶祝會的錄影kah罰款收據送去北京,m̄知beh得tio̍h幾百幾千倍的報賞﹖   

Chit件代誌,咱那會看tio̍h台北市那像是無政府咧?因為柯文哲市長假睏,叫bē精神!