十二月初六播出的華視新聞專訪中，民眾黨總統參選人柯文哲講「我內心本質猶原是深綠的！」真濟人聽了攏gāng去。
2014年十一月初七，台北市長選舉電視辯論會，中國國民黨候選人連勝文質疑無黨派候選人柯文哲過去bat講家己是「墨綠」，chit-má卻講beh重開機、超越藍綠，態度反覆。柯文哲反駁講「我講過我是墨綠，hit當時是為tio̍h向chit-ê社會證明你的銃傷是真的，我按呢講是為tio̍h台灣社會的和諧，你今仔日講我是墨綠，你是teh拆裂chit-ê社會，為tio̍h你個人的政治利益！」柯文哲是講2010年十一月二六，五都選舉前一暗，連勝文佇永和市助選，hông開銃誤傷tio̍h送去台大病院，有人懷疑連勝文tio̍h傷是假的，當時台大創傷醫學部主任柯文哲出面澄清「我是深綠的，我是上大的證人，chit-ê無可能造假」。逐個謳咾柯文哲，hit遍台北市長選舉真濟台北市民投票選hō͘柯文哲。
2014年柯文哲當選市長了後，一再聲明伊是穿白袍的醫生，代表白色力量，超越藍綠惡鬥。真濟市民相信白色mā bē bái。2015年八月十八，柯文哲市長第一遍去上海參加雙城論壇，開幕致辭講伊秉持「兩岸一家親」的精神kah「四個互相」原則，達到促進交流、增加善意的目標。Hông大驚一tiô的是，2013年十月初六，中國國家主席習近平佇印尼巴厘島正式提出「兩岸一家親」的講法了後，柯文哲是第一個tòe習近平的嘴尾講「兩岸一家親」的台灣政治人物，席近平聽了龍心大喜，中國緊kā柯文哲當作「家己的人」。此後，柯文哲一再發表pô͘中共尻川的言論。台北市民kā柯文哲講作是「意大利國旗」—綠、白、紅三色，可能有人聽khah無，講柯文哲是檳榔khah清楚：外表是綠的，內底白的，哺哺一下歸嘴是紅的。2019年八月初六，台灣民眾黨成立，驚hông講kah綠營愈行愈遠。九月初三，柯文哲接受《POP大國民》專訪的時，bat表態過是深綠的柯文哲講伊家己的底色無變，猶原是綠底的。
柯文哲敢有影是深綠的？伊若真正是深綠的，無可能tī五月發表國政白皮書，內容提到兩岸tio̍h重新啟動貨貿kah服貿談判；柯文哲若真正是深綠的，無可能會去kah藍色的中國國民黨鬥孔選總統副總統，想beh偃倒綠色的民進黨；十一月十五，有人問講，柯文哲過往bat講出世到taⁿ家己上討厭的是蠓仔、蟉choa̍h kah中國國民黨。今仔日卻beh kah中國國民黨整合？柯文哲若真正是深綠的，無可能應講：家己真討厭國民黨，但是koh khah痛恨民進黨；柯文哲若真正是深綠的，無可能會tī十二月初八講民進黨主席、總統候選人賴清德「人稱呼伊是台獨金孫，我看伊chit-má已經是台獨龜孫」。
Chit款的柯文哲講伊是深綠的，m̄驚笑破人的嘴！