基隆東岸廣場換主人爆發產權爭議，因為半暝去kâng鋸鎖換新鎖，致使“NET”頂日有登報要求基隆市長謝國樑「為強盜行為道歉」。二月十九，謝國樑佇立院召開記者會喝聲前市長、內政部長林右昌tio̍h出來講清楚。Hit暗謝國樑又koh開直播，講伊家己厝裡經濟穩定，無需要做對市民不利、但是對家己有利的代誌，換一枝話柄竟然講：「你認為林右昌有需要boh？我kā你講伊絕對有需要。」
林右昌透過面冊指出，tī伊任內規劃的合約是訂5年，若經營績效優良，會使有3年加2年、兩遍優先議約權，m̄是親像謝國樑按呢烏白亂舞，一簽約tio̍h 20加10年；而且無管廠商賺錢抑是無賺錢，每年攏tio̍h hō͘市政府5,050萬元，超額利潤市政府猶koh會使抽一半，但是謝國樑chit-má竟然kā固定權利金ùi 5,050萬元落kah變作1,500萬元。「請謝國樑隨時會失禮！」
真濟人khah關心的是謝國樑用伊本人kah林右昌來相比，暗示講伊是好額人無需要貪污，沝右昌是散赤人絕對有需要。實際上世間事敢是按呢？
三月初五，新聞報導：越南第一有錢的張美蘭女士，早起出庭應訊。Chit
位出身富裕家庭、mā是越南房地產大頭家的張美蘭，hông指控詐財、烏紗、侵用公款、濫用權力，大約有新台幣1兆3,897億（差不多是越南2022年國內生產總值GDP的3%），以及「欠缺責任造成嚴重後果」hông起訴。張美蘭hông掠去了後，拖出一大綰那像肉粽數百名政府高層官員，甚至有部長級的大官涉案。若是相關指控定罪，張美蘭上嚴重恐驚會hông判處死刑。
大清帝國乾隆皇帝時代上有權勢的大臣和珅（seng），做到「殿閣大學士」（皇帝的參政顧問kah最高幕僚）kah「軍機大臣」（雖然無品階mā無俸祿，但是實際上那像是宰相），bat兼任60幾個重要官職，la̍k權20外年。根據《查抄和珅家產清單》所列，有金碗碟4,288件、銀痰罐600個、金面盤119個、黃金580萬兩、銀元寶5萬個，猶有足濟厝kah土地無算在內。嘉慶皇帝以20條大罪下旨抄家、kā掠去關監，最後以一條白綾賜和珅自盡。現代學者研究伊貪污估算超出當時清國政府15年財政收入總和；另外有研究翻查清遺存檔案計算，伊的家產數量約佔嘉慶時代兩年的財政收入。莫怪伊會入選《亞洲華爾街日報》世界級大好額人的行列，伊mā是18世紀全世界第一好額的人。
咱知影，會貪污bē貪污kah一個人好額、散赤無關係。會貪污是因為有貪心kah有機會。謝國樑市長烏白講，伊的話bē信得！