七月二三，中國國民黨全國代表大會，黨主席朱立倫宣布，chit遍總統大選中國國民黨beh團結所有非綠的朋友共組「大同盟」、「在野大聯盟」，未來中國國民黨koh倒轉來執政了後，koh beh kah逐個共同建立一個和平、安定、公平、正義的「執政大聯盟」，共同翻轉台灣，hō͘台灣koh khah好。
七月二五，中國國民黨總統參選人侯友宜競選辦公室執行長金溥聰受訪問的時講，完全m̄知影啥物是「執政大聯盟」，伊講，伊kah侯友宜攏m̄知chit項代誌，伊mā對朱主席忽然間tàn出這個新名詞感覺奇怪。Hit下晡中國國民黨發言人楊智伃（û）tio̍h回應講，朱立倫主席佇全代會提起「執政大聯盟」的概念，tio̍h是beh團結所有泛藍、非綠、在野的力量，也tio̍h是結合所有理念仝款的力量，完成hō͘民進黨落台、政黨輪替的目標。
中國國民黨發言人按呢解說，m̄知頭腦一流的金小刀聽有抑無？像阮chit種普通人實在是聽無。到底是大選前beh「在野大聯盟」？抑是大選了才beh「執政大聯盟」咧？若是大選前beh「在野大聯盟」，到底beh按怎聯按怎盟？敢有kah民眾黨主席柯文哲講一聲？無。朱立倫主席講柯文哲主席真無閒。目前柯文哲的民調是嬴過中國國民黨的侯有宜，那會使無kah人講一聲tio̍h beh kah人「在野大聯盟」？藍營輔選人士有坦白講，現階段選前合作空間無大，干單有可能出現佇選後的立法院。按呢「在野大聯盟」是啥物碗糕？
目前在野勢力第二大的民眾黨主席柯文哲認為，現在國會3黨攏無過半的機率誠懸，伊猶原感覺，價值、政策、理念三項攏會合才有辦法合作。
中國國民黨主席朱立倫「大聯盟」的想法是ùi叼位來的？
六月十五，中國國民黨台北市議員、chit遍大安區立委參選人羅智強表示，
伊beh籌備組織「政黨輪替大聯盟」，對抗綠營假民主大聯盟，而且認為在野黨tioh手牽手合作，啥人作總統是次要問題；伊mā強調，伊無講無支持中國國民黨總統參選人侯友宜，上重要的目標是政黨輪替。若照羅智強的講法，選前若一直維持現此時的民調表現，到時當然tio̍h會棄侯友宜保柯文哲。莫怪引起藍營內部部分人士kā伊釘kah臭頭。第二工，羅智強佇面冊頂面發出道歉聲明，原本預定的記者會mā取消。
中國國民黨主席朱立倫講beh團結所有非綠的朋友共組「在野大聯盟」、「執政大聯盟」。Che到底是啥物碗糕？Mài講金小刀m̄知啥意思，咱一般人看m̄-bat。咱實在真懷疑，朱立倫主席敢知影伊家己teh講啥？ (230728)