八月十七，日本《產經新聞社》台北支局長Ya-ita Aki-o（矢板明夫）佇伊的面冊頂面講：中晝佇《華視》「三國演議」的直播節目中，抵好講到幾位可能的總統參選人。Hō͘我想tio̍h用武俠小說中的武林人士來做比喻。伊真客氣講，m̄知講了有對同抑無？看過伊面冊的人，攏謳咾kah會觸舌（tak-chi̍h）。
Ya-ita支局長佇面冊頂面講，最近的2024總統大選民調，賴清德繼續保持領先的地位。柯文哲有小可落、侯友宜有回升，郭台銘繼續teh玩（sńg）伊的矇矇霧霧戰略。對chit幾位伊有做一個比喻，伊講賴清德那像是名門大派的弟子。無論是內力、劍法、輕功、暗器，逐項攏佇水準以上。雖然伊m̄是絕對的高手，但是起腳動手mā攏有照步來，真少犯錯。而且最近一直堅持勤學苦練、武功佇伊真在的基礎頂面有teh提升。
也無組織也無錢的柯文哲，那像是一個江湖藝人（咱台灣人講的拍拳頭賣膏藥）。Ya-ita支局長表示柯文哲定定kā武術、雜技、魔術合合（kap- kap）做夥，進行表演。看起來奢iāⁿ趣味，所以定定會引吸真濟人圍來看，但是「內力平平，真濟招數干單好看頭niā-niā無啥物路用。」Kah人過招，設使前幾招若無法度kā對方háⁿ倒，tio̍h有可能顚倒hō͘對方壓制tiâu。
Ya-ita支局長講，得tio̍h中國國民黨提名的侯友宜，那像是佇某種因緣巧合下面得tio̍h飽足內力的非武林人士。可惜完全bē曉招數，家己koh bē曉控制內力。身體內的幾股內力經常互相拍來拍去、kā伊家己衝kah烏天暗地。最近有倩一位姓金的教練，教伊一寡上基本的吐納呼吸的方法，那像漸漸安定落來，但是會tang上場抑bē猶原真歹講。
Ya-ita支局長講，郭台銘那像是一位傳說中的武林高手，一直佇埸外觀看。一枝嘴直直講想beh入場，但是tio̍h是一直無beh向前踏出一步。真濟人講伊厲害，但是mā有人講伊其實是一拳無夠死。到底實力按怎，逐個攏猶m̄知。
Ya-ita支局長講，設使in三個聯手起來，檢彩有可能拍嬴。但是in三個人互相無信任，chit-má看起來三個人聯手的可能性無啥大。
雖然Ya-ita支局長所做的比喻誠實在，但是伊mā驚有人看了無歡喜，所以伊佇文章上後面特別聲明：以上的比喻，純然是好sńg的，完全無惡意。希望hō͘逐個看了笑一下。
Khah趣味的是，中國國民黨主席朱立倫講，m̄知影Ya-ita Aki-o teh講啥物。咱佇chia kā Ya-ita支局長講的話用台灣話唸出來，m̄知朱主席聽有抑無？