三月二十至二二，中國國家主席習近平去莫斯科kah俄羅總統浮丁會談，內容包括加深雙旁關係，經濟領域，國際局勢kah烏克蘭危機等。其中hō͘全世界上關心的是烏克蘭的和平。三月初十，斷交七年的伊朗kah沙烏地阿拉伯佇中國chhiâu促協議之下。宣布重建外交關係，所以有人認為，習近平拼勢beh促成俄烏戰爭停戰、簽訂和平條約。習近平有可能會得tio̍h諾貝爾和平獎。
二月二四，俄烏戰爭滿一年hit工，中國有提出「關於政治解決烏克蘭危機的中國立場」，提出12點講法，無一點對結束俄烏戰爭有幫助。
三月十三，中國外交部宣布一禮拜後習近平beh去訪問俄羅。三月十七，國際刑事法院（ICC）以非法kā兒童帶離開烏克蘭作理由，對俄羅總統浮丁發布戰爭罪逮捕令，時間chat kah chiah抵好？那像是順續警告一日到暗講無beh放棄武力拍台灣的習近平，千萬m̄-thang去犯tio̍h戰爭罪！
三月二十至二二，中國國家主席習近平佇莫斯科kah俄羅總統浮丁見面會談，雙方佇會後聯合聲明中強調beh「通過和談」來解決烏克蘭危機。但是西方國家不止緊張，恐驚中國會採取外交抑是經濟以外的手段，進一步支持俄羅——提供武器hō͘浮丁佇戰爭中使用——而且鞏固一個反對北約kah美國的強大集團。西方國家的煩惱是加額的，「鞏固一個反對北約kah美國的強大集團」是真的，但是「提供武器hō͘浮丁佇戰爭中使用」是無可能的代誌。中國表面上假仙講驚北約kah美國kā制裁，事實上是中國愛俄羅繼續佇烏克蘭的戰爭，習近平主席絕對無可能向浮丁總統施壓，勸伊停止戰爭罪行kah暴行，甚至勸伊撤走軍隊。戰愈激烈、戰愈久愈好。鐵拍的身體mā bē堪得三工的落屎，繼續戰落去，俄羅一定會消瘦落肉，歸尾俄羅會變作中國老大身軀邊叫嘴的「細漢的」。同時北約kah美國的國力mā是會大損，到時世界真正的老大tio̍h是中國。
烏克蘭的Chelen-su-ki總統有透露講烏克蘭kah俄羅的和平談判底線：俄羅tio̍h恢復烏克蘭領土完整、尊重聯合國憲章、賠償一切戰爭損失、懲罰每一個觸犯戰爭罪的犯人，以及保證bē koh侵犯烏克蘭等前提。
俄羅總統浮丁內心真想beh停戰，但是伊嘴踏真硬，伊講烏克蘭tio̍h真正做到「去納粹化」、「去軍事化」kah完全中立的三大要件，上要緊的是伊講，俄羅的軍隊無beh ùi所佔tio̍h的任何土地撤退。
中國、俄羅兩國頭人會談，那有可能帶來烏克蘭和平？我看，兩個頭人只不過是畫一個空殼餅，hō͘戇人止枵。