五月二四，中國國民黨召開記者會，講明年大選是戰爭kah和平選舉，批評蔡英文總統kah賴清德副總統是「戰爭販仔」的共犯結構。笑死人！「戰爭販仔」是中國，一日到暗kah「戰爭販仔」使目尾的正是中國國民黨。中國chit-ê「戰爭販仔」一直喝講beh用武力統一台灣（「武統台灣」），驚咱台灣人無愛相信，中國軍機軍艦曠（làng）時無曠日來咱台灣航空識別區kah海峽中線附近擾亂。最近「武統台灣」的聲音那會愈來愈細聲？
中國的空氣那會變hiah緊？中國頭人幾年來敢m̄是一直強調，中國無beh放棄用武力拍台灣。兩個月前，中國解放軍上將劉亞洲發表一篇《金門戰役檢討》，金門廈門hiah呢近，中國to̍h拍bē贏，隔一個台灣海峽平均有180公里闊，上狹的位mā猶有128公里闊，中國解放軍是beh按怎拍台灣咧？按呢洗面完全是礙tio̍h習近平的鼻！掠起來，那像猶未判刑。才過兩個月，中國tio̍h會使罵講beh「武統台灣」的人是戇人抑是啥物歹心。
Chit三年武漢肺炎，害中國經濟發展停頓，外國廠商大撤退、走了了。對中國經濟發展當然大傷。地方政府負債累累，地方銀行欠人民錢無才調還，人民怨聲四起。最近武漢肺炎koh發燒起來，照中國專家鍾南山講：到五月底，平均每禮拜會有4,000萬人確診、到六月底，平均每禮拜會有6,500萬人確診。Chit兩年，美國加強加速武裝台灣。現現看世界第二大軍事強國俄羅，拍一個小小的烏克蘭，原本想講佔領烏克蘭那像桌頂拈（ni）柑，無想tioh chiah呢困難、拈柑的手險險仔hông剁去。中國當然有teh看，俄羅去烏克蘭的路平坦坦，to̍h拍kah chiah艱苦，何況中國台灣隔一個台灣海峽？
全世界民主國家的會議攏會提起，台灣海峽有代誌，tio̍h是世界的代誌。那像攏是講真的。中國bē使tèⁿ m̄知。
中國chit幾年一直宣傳，hō中國人民相信武統台灣的戰爭一定會發生。武統台灣炒了傷過頭，五月初，中國thiau工hō͘中國可能會陷入「四面作戰」的文章佇網路頂面直直傳。文章講中國若「武統台灣」，中國隨時tio̍h面對四條戰線：第1條戰線佇台灣海峽，kah美國、台灣、日本的武裝力量戰鬥。第2條戰線佇東北方，美國可能聯合韓國向中國東北攻擊。第3條戰線佇南海，美國可能聯合菲律賓，甚至澳洲kah東南亞國家對中共攻擊。第4條戰線佇西南方，印度可能會趁中國陷入戰局來進攻中印邊境。
咱無驚中國拍台灣。上驚台灣人無仝心。真正團結起來，啥物mā m̄驚！