騙kah假是中國的兩大撇步。會記得1981年中國人口達到10億，佔世界人口22%，無諾久中國tio̍h流傳一個順口溜：「十億人口九億騙」，你想講猶有一成老實人？錯了！因為後半句是「還有一億在訓練。」頂司騙下司，下司騙頂司，政府騙人民，人民騙政府，人民互相騙。用啥騙？講假造假來騙對方。
相信真濟人攏bat聽過chit-ê中國造假的故事：一個農伯仔去買一大包種子，辛苦幾仔工落去種koh沃水，幾十工後發出一大片的雜草，因為伊買的種子是假的。農伯仔誠傷心，想beh自殺tio̍h去買農藥來飲，結果無死，因為農藥是假的。為tio̍h農伯仔無死、拾（khioh）tio̍h命，厝裡的人去買酒來慶祝，結果全家中毒死去，因為酒是假的。
造假並m̄是干單中國有niā-niā，全世界四界攏有人teh造假。但是無一個國家親像中國造假造kah chiah呢齊勻（chiâu-ûn）chiah呢澈底。假貨免講，文憑mā假。若是連政府發佈的數據mā是假的tio̍h會hông驚！中國政府公佈今年六月份城鎮16至24歲失業率21.3%是歷史上蓋懸的。但是中國《財新網》引述北京大學副教授張丹丹研究指出，若將大約1,600萬名倒平平、kah食父母m̄做工課的青年攏看作失業，中國今年三月份青年實際失業率有46.5%。八月十五，中國國家統計局佇記者會宣佈，ùi今年八月起無beh koh發佈青年失業的數據。繼續公佈會真歹看。Mài公佈總是比公佈假的數據有khah好，但是按呢mā koh騙人講是為tio̍h調查統計工作的「健全優化」。Che tio̍h是中國。
八月初，世界田徑總會公佈最新世界排名，卻無看tio̍h中國兩位外表查埔體的女選手廖孟雪kah童曾歡，mā hō͘兩人性別疑雲再度引起討論。廖孟雪是二百公尺kah四百公尺高手、童曾歡專攻四百公尺，兩人過去因為明顯的頷頸珠傷過大粒等男性的外型，hông質疑是「查埔身」。世界田徑總會有tī六月要求中國田徑協會，對各省隊的女選手進行「血睪酮」檢測，一旦超標tio̍h禁賽。所以chit兩人hông除名可能kah chit-ê規定有關。連性別mā beh騙，可憐！
中國佇in國內按怎騙按怎假，是in兜的代誌。拜託mài騙mài假到台灣來！2021年五月，咱台灣tng無閒拍拼防治武漢肺炎，tio̍h有人假作《自由時報》的名開設Twitter帳戶，散布謠言講「台北新北一秒變作鬼仔城，那像是萬華大量肺炎遺體集中焚燒。」刑事局有介入偵辦，是對岸網軍所做的假新聞。
明年正月十三，台灣beh選總統副總統kah立法委員，中國家己的人民無愛照顧hō͘好，卻誠有可能會用騙kah假的消息來擾亂台灣，咱bē使無注意。