十月初七新聞報導，日本《產經新聞》台北支局長Ya-ita Akio（矢板明夫）發文講起近來日本的一個現象，有bē少中國人假作台灣人吸引人客的事件。
Ya-ita支局長提起，伊佇日本媒體看tio̍h一條新聞，Fuku-oka縣有一間台灣料理的店主，因為詐騙罪hō͘警方掠去，原因是chit間料理店tī疫情期間偽造員工資料，領取當地政府的疫情補助。值得注意的是，hông掠去的27歲男性店主是中國人，kah台灣一點仔關係都無。真濟人指責中國人假作台灣人開店，mā有人講騙政府的補助當然m̄-tio̍h，假作台灣人欺騙消費者koh khah m̄-tio̍h。
Ya-ita支局長講，最近chit幾年，中國人佇日本開台灣料理店愈開愈濟，聽講是因為chit幾年中國的反日浪潮，hō͘中國的形象受tio̍h嚴重打擊，中國料理店的人客mā直直減少。顚倒反，台日關係愈來愈燒lō，日本人mā愈來愈合意台灣料理。台灣料理比中國料理khah無hiah油，mā hō͘人khah健康的印象。
十月初六，中國國民黨立法委員陳雪生佇立法院質詢的時提起，伊的祖先佇中國、佇台灣無半個親成，「講中國是我的祖國mā無過頭ah」，但是伊隨時koh講伊全世界行透透「我上合意台灣」。陳雪生那會無上合意伊嘴裡講的「祖國」咧？真m̄-tio̍h。若真正愛伊的「祖國」，應該拼轉去，kā「祖國」建設成作伊上合意的所在。上合意無半個親成的台灣創啥？伊明明是teh假作中國人。
十月初六，中國國民黨總統參選人侯友宜召開「投資教育，贏得未來」記者會，提出11項教育政策主張。其中hông驚一tiô的是，侯友宜講beh重新探討「去中國化」的課綱。因為伊認為，台灣學生bē使bē記得中華文化的根！伊竟然主張台灣學生tio̍h「暗唸中國長江、黃河流過的省份」！咱當然無反對學生讀世界各國的地理，但是伊kā「暗唸」kah「中國地理」列作教育政策的重點，hō͘咱看出伊是beh假作中國人。Chit種beh假作中國人的人想beh競選作台灣的總統，敢bē傷好笑？
佇日本Fuku-oka縣假作台灣人的中國人，in若是真正beh作台灣人，tio̍h愛有台灣的身分證抑是護照，tio̍h納過台灣的稅金，kah盡過台灣國民的其他義務。雖然in自了m̄-bat講in是台灣人，但是為tio̍h利益in足愛假作台灣人。
仝款，佇台灣愛假作中國人的台灣人，in無中國的身分證抑是護照，in無納過中國的稅金，mā m̄-bat佇中國盡過任何中國國民的義務。雖然in自了m̄-bat講in是中國人，但是為tio̍h利益in足愛假作中國人。
看tio̍h chit種足愛假的怪現象，m̄免奇怪。看久tio̍h會慣勢，慣勢tio̍h好。