有一寡半生熟民主國家的議會，三不五時tio̍h會有程度無仝、齣頭新奇的暴力事件發生。咱佇台灣已經看kah慣勢慣勢ah。像講2016年七月初一，中國國民黨不滿行政院「一例一休」方案，九點外有三十名中國國民黨立委霸占主席台。民進黨立委自備大聲公，佇台仔腳kah中國國民黨立委對罵。院會一早起空轉；像講2017年七月十三，有立法委員向行政院長林全khian水球，林全無法度發表預算報告。會議被迫暫停；像講2017年七月十四，立法院因為內政「前瞻計劃」法案的審核kah通過，koh爆發激烈衝突。M̄-nā佇國家最高議會殿堂piaⁿ椅仔、khian水球，甚至有立委hông拍tio̍h傷；因為政府會ùi 2021年正月初一起，允准進口含有萊克多巴胺的美國豬肉kah 30個月以上的美國牛肉。十一月二七，中國國民黨立委為tio̍h beh阻止行政院長蘇貞昌佇立法院進行施政報告。有國民黨立法委員向蘇貞昌的備詢台khian豬腹內，而且佇會場製造噪音，藍綠立委爆發生嚴重肢體衝突，蘇貞昌最後佇混亂中結束施政報告。
為tio̍h「3+11」會失禮事件亂三工了後，聽講中國國民黨立委準備beh tī十月初一提出195案增列報告事項，內容有牽涉tio̍h「3+11」、議事不公、台電跳電kah欠電議題、國防預算、鳳梨釋迦禁止出口到中國、縣市合併檢討、離岸風電國產化跳票、不在籍投票、加入CPTPP。那像真正beh開始進行質詢。
十月初一透早七點，立法院議場大門一下開，中國國民黨立委tio̍h順利進入立法院議場，一陣人去坐官員席，幾個人佔tio̍h官員備詢台，拼勢翕相作紀念，歡喜kah笑hai-hai！坐佇官員席的中國國民黨立委歡喜kah一直拍桌面。幾位中國國民黨立委去kā官員備詢台ián倒，意思那像是講，阮已經無可能有機會徛佇官員備詢台，mā無愛hō͘恁徛佇chia臭chhèng。Ùi chia咱會tàng看出中國國民黨chit-ê溜尾仔政黨立委的悲情。啥物悲情？
九月二五，中國國民黨選黨主席，投票率約49％，整體投票數約18萬
8,000票、當選的朱立倫the̍h tio̍h 8萬5,000票、得票率約45.78%，算起來干單22.43%的黨員選伊niā-niā，是中國國民黨主席直選以來頭一個得票無過半的。Chiah呢無得黨員支持，chit款的黨主席beh那有可能tī 2024年總統大選選贏、得tio̍h政權咧？中國國民黨chiah-ê立法委員明知chit-ê勢面無救，心肝底的苦楚koh無地敨（tháu），趁chit-ê 機會ián倒官員備詢台來出氣（khùi），坐佇官員席罔過癮（kòe-giàn）。
Chit種行為完全是一個溜尾仔囝政黨立委的表現，悲哀ah！