中國國民黨總統參選人侯友宜最近的民調並無起色，七月初八，卻傳出中國國民黨預計郭台銘之亂九月中會煞，到時郭台銘若歸隊，侯友宜的民調tio̍h會回轉來到第二，tio̍h會開始kah柯文哲談合作，進行非綠大整合，而且無排斥「侯柯配」。中國國民黨高層ùi頭到尾的態度，tio̍h是beh愛民眾黨總統參選人柯文哲「無條件投降」，中國國民黨無可能接受「柯侯配」
七月初八下晡，柯文哲出席醫療生技產業見面會koh有發表演講。記者kā柯文哲講，中國國民黨講beh愛伊「無條件投降」。柯文哲聽一下煞gāng去，目睭展大大蕊倒問講：「無條件投降？」那像相當tio̍h驚。記者問講：你敢會投降？柯文哲煞哈哈大笑講：「那會按呢問？‧‧歸氣‧‧mài講笑。」才ko͘h笑笑仔講，會發line答覆記者。
Mài講柯文哲本人聽tio̍h「無條件投降」會gāng去，咱無事人聽tio̍h mā感覺天烏一旁。咱先來瞭解啥物叫作「無條件投降」。相戰雙方，戰輸的hit旁為tio̍h希望結朿戰爭，會提出「無條件投降」，允准戰嬴hit旁隨在按怎處理，beh煎beh煮beh按怎管理控制in-ê政治kah社會，攏無意見。但是，若是khah嬴hit旁要求對方「無條件投降」，有可能會引起khah輸hit旁bē爽kah煩惱，致使戰爭無法度緊結束，顛倒kā戰爭拖長。
若照七月初七《匯流新聞網》公布上新7月份總統大選民調，調查結果顯示，合併市內電話kah手機仔的大樣本調查中，民眾黨柯文哲支持度以30.8%得第一名，小可領先支持度29.3% 的民進黨賴清德，雙方差距1.5%，中國國民黨侯友宜跋破兩成，支持度干單18.5%上尾仔名。
鴻海集團創辦人郭台銘前一站傳出講，有意「併購」民眾黨。七月初十民眾黨主席、總統參選人柯文哲證實，koh講郭台銘最近猶有拍打電話hō͘伊，但是伊一下看是郭台銘，伊tio̍h驚kah m̄敢接電話。Ùi chit點咱知影，郭台銘想beh kah柯文哲合作，m̄是叫柯文哲「無條件投降」，是採取「併購」民眾黨的方式，意思是講柯文哲會tàng the̍h tio̍h一大把箍箍。郭台銘算是有誠意。
照中國國民黨家己爽的算盤按呢拍，到目前為止戰果第一名的柯文哲，tio̍h向戰果第三名的侯友宜「無條件投降」。中國國民黨戇話講bê煞！
Khah奇怪的是，凡若抵tio̍h無滿意的代誌，抑是聽tio̍h無合意的話tio̍h會隨時跳起來罵人的柯文哲，chit遍中國國民黨kā伊按呢洗面、叫伊「無條件投降」，柯文哲竟然恬chiⁿ-chiⁿ。Chit點有小可奇怪。