鴻海董事長郭台銘最近表態有想beh koh轉去中國國民黨參選總統，二月十六，前立委蔡正元佇面冊頂面唱聲：「中國國民黨m̄是公共便所，需要的時衝入去放一pû尿，放了koh嫌便所臭，離開的時koh喠（phùi）一糊痰，等到人kā便所拼掃清氣，伊認為家己真大尾，koh走倒轉來硬beh koh放一pû尿。」雖然蔡正元ùi頭到尾攏無叫名叫姓，但是逐個mā攏知影伊是teh講郭台銘。
台灣話放尿有人講作「漩尿」，台灣有一句俗語話講：「囝仔人放尿漩過溪，老人放尿滴tio̍h鞋。」另外chit字「漩」字有時mā hông the̍h來作足受氣罵人的意思。像講有人做非常m̄-tio̍h的代誌，tio̍h有可能引起真濟人kā罵，一般是講「眾人漩」。
2005年三月十四，中國「人代會常務委員會」通過「反分裂國家法」，仝一日生效實施。中國beh制訂啥物法律、beh制訂幾千條攏是in兜的代誌。問題是chit-ê法律第一條tio̍h講：為tio̍h反對kah遏制「台獨」分裂勢力分裂國家，促進祖國和平統一，維護台灣海峽地區和平穩定，維護國家主權kah領土完整，維護中華民族根本利益，根據憲法，制定本法。 第二條講：世界上只有一個中國，大陸kah台灣仝屬一個中國，中國的主權kah領土完整不容分割。 維護國家主權kah領土完整是包括台灣同胞在內的全中國人民的共同義務。
真正是豈有此理！三月二六，「三二六民主和平護台灣大遊行」，陳水扁總統kah台灣民眾做夥遊行，向台灣海峽對岸kah國際社會喝出「愛民主」、「愛和平」、「要自由」、「反侵略」、「反威脅」、「保家園」、「護台灣」等十個大隊。表達憤慨kah不滿。反對中國制訂「反分裂國家法」。
四月二六，中國國民黨主席、家己講是「純種中國人」的連戰chhōa 70人去中國，講是「中國國民黨和平之旅」，去見中共中央總書記、國家主席、中央軍委主席胡錦濤，佇北京人民大會堂進行會談，有達成五點共識，同意佇九二共識頂面推動兩岸談判。中國國民黨按呢做，當然會hō͘國際社會誤會：台灣人並無反對中國制訂「反分裂國家法」。佇台灣，中國國民黨當然hō͘眾人漩。
2022年八月，中國藉口美國眾議院誐長初二訪問台灣，佇台灣四箍圍拍飛彈，八月初十中國國民黨派副主席夏立言chhōa團去中國訪問，雖然伊強調是非官方、顧民生。但是tī chiah呢敏感的時陣去中國訪問，莫怪hō͘眾人漩。
中國國民黨是m̄是公共便所，hō͘ in的黨員家己講khah準，但是中國國民黨眾人「漩」的代誌，濟kah講bē了。 (230224)