2024年總統大選，一開始，中國國民黨主席朱立倫提出「非綠大聯盟」，tio̍h已經表明中國國民黨拍bē嬴民進黨，驚kah未戰tio̍h先認輸，實在是無骨氣。伊希望招別黨鬥出力、做夥拍嬴民進黨。咱無應該講中國國民黨無骨頭軟siô-siô。咱看中國國民黨立法委員有37席，民進黨有62席，干單chit項輸niā-niā。其他像講全國縣市長中國國民黨有14個、民進黨5個；縣市議長副議長中國國民黨有26個、民進黨6個；縣市議員中國國民黨有394個、民進黨有238個；全國鄉鎮市長中國國民黨有80個、民進黨40個；全國村里長中國國民黨有1,221個、民進黨285個。你看，中國國民黨佇地方的組織動員力量那是民進黨會比得的？Chiah呢粗勇的中國國民黨那會m̄敢kah民進黨孤對削選總統咧？小想一下，原來是伊無骨頭！
中國國民黨內m̄是逐個攏無骨頭。侯友宜競選辦公室執行長金溥聰tio̍h相當無認同選總統tio̍h kah人合，早早tī七月二五tio̍h直剖：「白正藍副」無可能，無法度接受中國國民黨hông食掉的命運。Kah民進黨釘孤枝，準若是選輸「mā-tio̍h徛挺挺倒落去。」可惜有骨氣的金小刀hông釘kah滿身是傷！
中國國民黨的朱立倫頭一個chhōe民眾黨的柯文哲來「藍白合」，合來合去合bē好勢，「藍白合」煞變作「藍白拖」。無疑誤十一月初十，馬英九前總統跳出宣讀「聖旨」：藍白合tio̍h用柯文哲提出的全民調，藍白無合絕對bē嬴。朱立倫、侯有宜、柯文哲攏跪teh喝講：領旨。謝皇恩！中國國民黨kah民眾黨攏無骨頭kah chit款！
馬英九前總統任內的行政院長劉兆玄，十一月十四beh去南京參加「2023兩岸企業家峰會年會」出發前，專工拜託馬英九前總統tio̍h出來促成「藍白合」；真抵好，馬英九基金會執行長蕭旭岑tī 十一月初二至初五，去北京訪問三工，出席佇釣魚台賓館舉行的北京論壇，轉來台灣了後，馬英九tio̍h出手促成十一月十五第二次「藍白合」政黨協商會議，佇馬英九前總統見證下達成6點共識。有一點講同意全民調，但是民調結果佇誤差範圍3%以內，民眾黨tio̍h讓中國國民黨。百年老店的中國國民黨，敢講出chiah呢無骨頭的話！
十一月十五，中國「全國台企聯」強烈建議，為tio̍h改善台海的緊張關係，促進兩岸的和平發展kah經濟的融合發展，藍白二旁應該以大局為重，無放棄任何拍開僵局的方案，趕緊完成統合，實現政黨輪替。Che是另外一道聖旨。
按呢咱tio̍h知影，是按怎那會m̄-nā中國國民黨、連民眾黨mā無骨頭！