中國外交戰狼講白賊面bē紅!

  台灣時間五月十一暗時十點,WHA網路報名截止,咱猶戇戇teh等待邀請函。無意外,世界衛生組織(WHO)連續第5年無邀請台灣。到hit暗咱tio̍h知影今年參加WHA大會作觀察員koh無望ah

五月初六,美國加拿大英國法國德國義大利kah日本七大工業國集團(G7)外交部長會議結束了後,發表聯合聲明強調台灣海峽和平穩定的重要性,鼓勵和平解決兩岸問題,強烈反對任何可能增加緊張局勢、破壞區域穩定的片面行動。聲明koh講,支持台灣有意義的參與世界衛生組織論壇kah世界衛生大會(WHA)。聲明講台灣有權參與WHO等國際組織,台灣所有的武漢肺炎(COVID-19)防疫經驗,會tàng對全世界做出貢獻,「排除in(台灣)參與是家己chhōe死路」。五月初六,法國參議院召開院會以304票贊成、0票反對,無異議通過「台灣參與國際組織工作」,正式成案,擴大支持台灣參與WHO、國際民航組織、聯合國氣候變化綱要公約kah國際刑警組織等各領域的國際組織。五月初八,美國國務卿富林肯發表聲明,呼籲恢復台灣佇WHA的適當地位,伊表示實在chhōe無任何排除台灣參與的講會通的理由。雖然今年真濟國家thīn台灣,那像比往年希望加真大。但是m̄值tio̍h中國一個搖頭,tio̍h是bē-tàng參加。

    台灣猶koh hông排除佇世衛大會(WHA)外面。五月初十,中國外交部發言人華春瑩對chit件代誌koh臭彈一遍「一中」老調,而且講「中國中央政府對台灣地區參與全球衛生事務會做出真好勢的安排」。外交部長吳釗隨時寫推文大罵中國無恥,罵講in講的是「bē見笑的白賊話」。華春瑩koh講:「事實上無人會比阮(中國)koh-khah關心台灣同胞的健康福祉。」民進黨立委王定宇笑一下,緊the̍h童話故事出來講:那像「大野狼上疼惜小紅帽」。

  全世界的人攏知影是中國teh變鬼變怪,咱台灣才無法度參加世衛大會(WHA),但是中國外交部發言人華春瑩講:「台灣地區無法度參加世衛大會的局面是民進黨當局造成的」。伊一支指頭仔比台灣,另外四支指頭仔比伊家己。

  Hō͘咱想起2003年,因為中國的阻擋致使WHO無beh討論台灣重新加入的問題,有台灣記者問中國代表:恁敢無聽tio̍h 2,000萬台灣人的需要?中國代表沙祖康應講:「誰理你們!」(意思是講啥插恁),雖然橫霸hông感覺真差,但是至少伊比較khah sêng一個中國人,講出in的心內話。原本台灣人的健康kah生死,中國人那有teh插你,那有teh關心你茢!

  看今仔日講白賊面bē紅的中國外交戰狼,實在真討厭!