五月初十新聞報導：烏俄戰爭進行1年外以來，已經有幾名新聞記者佇前線採訪的時死亡，初九《法新社》指出，初九《法新社》攝影記者索丁佇烏克蘭東部城市Pa-ho-mu-to附近hō͘火箭彈彈tio̍h身亡，才32歲。新聞記者是按怎tio̍h kā關心？因為無論是作風颱、淹大水、大地動各種天災地變，抑是戰爭動亂、抑是不幸事件發生，新聞記者攏是走佇上頭前、冒tio̍h生命危險，kā第一手上新、上正確的報導送到閱聽大眾的面前。
五月初三是世界新聞自由日，「無國界記者組織」關心全世界新聞記者是m̄是會tàng自由採訪kah報導新聞。今年發布的《2023新聞自由指數》報告。台灣佇180個國家中排佇第35名，比舊年升3名，mā是亞洲的第1名。「準講排名升懸，並m̄是代表台灣新聞koh khah自由ah。」無國界記者東亞辦事處執行長愛微紅（Cédric Alviani）示警，台灣政治兩極化的情況猶原存在，而且定定發生「因為政治立場無仝煞來扭曲事實」。伊認為che會妨礙tio̍h閱聽大眾接觸無夠客觀、公正的資訊，mā是對台灣新聞自由進步的一大阻礙。愛微紅mā指出，台灣媒體為tio̍h「搶緊」，第一線記者定定無充分時間查證，編輯台mā無顧守好勢，是台灣一直存在的問題。愛微紅指出，台灣雖然佇亞洲排頭名，但是猶有真大的進步空間。
Chit-ê指數是根據政治、經濟、立法、社會文化kah安全等五方面進行評分。挪威koh一遍第1名，愛爾蘭ùi舊年第6名升到今年第2名，丹麥跋一位變第3名。其他西方國家，加拿大第15名、德國第21名、法國第24名、英國第26名，美國第45名，戰火下的烏克蘭，ùi 106名跳升到第79名；交戰的俄羅落9名，變作第164名。
「無國界記者組織」kā新聞自由指數分作：「誠好」、「好」、「有問題」、「差」、「極差」等5個等級。愛微紅對全球新聞自由發展表示煩惱，佇180國內底，干單8個國家達到「誠好」的等級，44個國家「好」，55個國家是「有問題」，「差」kah「極差」的國家加起來有73國，等於全世界有4成國家是佇新聞足無自由的狀態下面。
Ùi尾溜算倒轉來，極差第1名是北朝鮮、第2名是中國、第3名是越南；中國舊年是第175名，今年落4名。現時全世界有363名新聞記者hông關監，中國有114位記者kah捍衛新聞自由的人hông關監，今仔日，中國已經成作世界上大的「記者監獄」，可憐！