中國戇戇,看蓬佩奥phú-phú!

 十一月十二,美國國務卿蓬佩奥(Michael Pompeo)接受美國媒體訪問的時講,「台灣chēngta是中華人民共和國(PRC)的一部分。強調美國對台灣的承諾是跨黨派的共識。」中國政府聽了相當受氣。早前中國媒體《北京日報》bat罵蓬佩奥是「人民公敵」,九月十七罵伊是「肥豬蓬」。十一月十五,中國《中央電視台》罵伊是「人渣」是「攪屎棍」;《人民日報》海外版用「四字經」:「末日瘋狂、傲慢無知、居心險惡、誤導輿論、擾亂視聽、極為陰險。」來罵蓬佩奧。中國戇戇,看蓬佩奥phú-phú,烏白亂罵

十一月十六,佇歐洲訪問的蓬佩奧用“Twitter”發出重大訊息,伊強調,美國會繼續實施《全球馬格尼茨基人權問責法》(Magnitsky Act),用法律制裁hiah-ê迫害人權的人。

   Chit-ê法案是紀念一位俄羅律師mā是稅務調查員馬格尼茨基,伊發現一陣內務部官員有貪腐行為了後,hông掠去關落監,聽講伊佇獄中有受tio̍h毒打,厝裡的人mā bē-tàng去探監,伊破病申請去看病mā無得tio̍h允准。2009年十一月十六,馬格尼茨基死佇獄中,才三十七歲niā-niā。伊在生的頂司認為應該對馬格尼茨基的死負責的人,佇俄羅無可能受tio̍h處罰,真濟俄羅的大官攏誠有錢,而且定定去歐美旅遊。伊認為,佇別國對in實施制裁顚倒khah有效。

  美國《全球馬格尼茨基人權問責法》,2012年眾議院通過,2015年參議院通過,2016年附加佇年度《國防授權法》內底。Chit-ê法案授權美國總統kah美國政府制裁侵犯人權的外國腐敗人員kah機構,阻止抑是撤銷in入境美國簽證抑是凍結in的資產,而且禁止chiah-ê外國官員佇美國的財產交易等。目前全世界至少有六個國家已經通過類似的法案,澳洲、法國、瑞典、荷蘭幾個國家猶teh審議相關的立法。

2020年七月初九,美國財政部宣布,制裁中國新疆四名現任kah前任政府官員,因為in牽涉tio̍h「嚴重侵犯新疆少數民族的權益」;八月初七,美國財政部宣佈,制裁包括香港特首林鄭月娥在內的十一名中港官員,因為in損害香港自治。十一月初十,美國國務院宣布,追加制裁四名中港官員。

    Chit-ê法案會hō͘受制裁的人驚tio̍h的,m̄是干單去美國的簽證hông取消,上可怕的是in佇全世界的銀行存款會hông凍結起來。Chit步是今仔日中國大官上蓋驚mā是對in上蓋有效的一步。

    中國戇戇,看蓬佩奥phú-phú!伊若真正出手,真濟中國大官會笑bē出來。