十月十六至二二的中共二十大，中共總書記習近平koh一遍強調講，「祖國完全統一一定tio̍h實現」，而且「絕對無承諾放棄使用武力」。雖然嘴硬講beh拍台灣，但是會拍bē拍tio̍h看客觀的條件。《日本產經新聞》台灣支店長Ya-ita aki-o san（矢板明夫）講，幾年前伊訪問過中共軍方高層，hit位官員講中共出兵拍台灣有三個條件：第一，軍力上中國對台灣有拍死死的差距，會tàng tī短時間內kā台灣拍落來；第二，以美國作頭的陣營無介入台海關係，像講美國出現一個親中的總統，抑是出現內亂，抑是hông捲入去中東、歐洲的戰爭；第三，台灣出現嚴重的內亂，一個類似「無政府」的狀態。而且中共判斷一定拍會贏才會動手。另外一個變數是，若是習近平頭殼無清醒。
中國tang時會拍台灣？美國中央情報局副局長可亨（David Cohen）講，習近平已經下令共軍tī 2027年進前具備武統台灣的能力。所以伊認為2027年進前中國會拍台灣。《美國之音》報導，十月十八，美國共和黨眾議員Ka-lú-ka（Mike Gallagher）表示，習近平展開第三任期了後，會佇台灣問題頂面變作koh-khah氣勢逼人，2024年台灣大選後可能是「上危險」。
十月二六，發明「九二共識」、中國國民黨的國安會前秘書長蘇起講到台灣佇美中關係中的角色，伊khau洗蔡英文總統是一個誠好的棋手，kā台灣操作變成「三張陰陽面」，包括兩岸關係、民主自由kah戰鬥意志，佇蔡總統操作之下，美國干單看tio̍h陽的一面，誤判台灣佇兩岸是維持現狀，佇民主是白雪公主，佇戰鬥意志上是勇敢的，但是事實上台灣內部卻抵抵是倒反。Kā台灣帶到戰略的「絕境」。蘇起預言，中共二十大了後、習近平第三任的5年內，歷史的審判可能真緊tio̍h會到ah。全世界的人攏知影中國習近平一定beh拍台灣，干單蘇起kā中國拍台灣講作是歷史對蔡英文總統的審判，實在真可惡！
今年「雙十節」，蔡英文總統致詞的時講：台灣願意為區域的和平發展貢獻一己之力。佇兩岸關係的立場上，咱的善意無變、承諾無變，維持現狀tio̍h是咱的主張，咱會全力阻止現狀hông片面改變。伊強調，解決兩岸bē ha̍h的意見，一定tio̍h透過平等的對話。咱bē去做冒險的代誌，但是絕對m̄-thang想講台灣人民會佇壓力下面屈服。咱會繼續充實國防，展現自我防衛的決心，確保無人會tàng逼迫咱行向中國所設定的路徑。因為中國所設定的路徑內面，bē有台灣民主自由的生活方式，koh khah bē有兩千三百萬人的主權。
中國敢會拍台灣？Tang時會拍？M̄是咱台灣人會tàng決定的。