九月十四新聞報導，咱國駐美大使蕭美琴頂日hông邀請去「全美議會交流理事會」（ALEC）演講，憑伊滑溜的英語kah穩健的台風，得tio̍h台仔腳的掌聲。演講中，伊講起中國「氣chhoa̍h-chhoa̍h的戶椗真低」，意思是講中國足愛受氣，伊講：「任何阮做的代誌、阮的存在、連阮佇奧運頂面贏in，in mā bē爽。」隨時引起台仔腳的大笑，續落去是熱烈的拍pho̍k仔聲。
中國那會tio̍h tio̍h chit種怪病咧？因為中國空思夢想台灣是中國領土不可分割的一部分。事實上逐個攏知影，中華人民共和國自從1949年十月初一建國到今，自了m̄-bat統治過台灣一工，連一分鐘一秒鐘mā m̄-bat。中國一直幻想台灣是伊管的，任何代誌台灣攏bē-tàng比中國khah gâu、khah好，所以chit遍東京Olympic男子羽毛球雙打咱的選手李洋kah王齊麟，最後決賽抵抵是拍贏中國隊的劉雨辰kah李俊慧，得tio̍h金牌。Chit聲中國的義和團真受氣，世界兩百國輸啥人攏會使。那會使輸hō͘台灣？實在是「不可忍也」！
中國錯覺台灣是伊管的，無伊的允准任何kah中國有邦交的國家的官員攏bē使kah台灣的官方有任何來往。2020年八月三十，捷克參議院議長韋德齊組一行九十人的代表團訪問臺灣，kah咱總統蔡英文等官員會面。八月三十一，中華人民共和國外交部長王毅就捷克參議院議長訪台表示：「佇台灣問題頂面挑戰一個中國原則，tio̍h是kah十四億中國人民為敵，對捷克參議長的公開挑釁kah伊背後的反華勢力，tio̍h為伊家己的短視行為kah政治投機付出沉重的代價。」有影是情理不平氣死閒人，九月初二，隔壁國斯洛伐克總統Chha-pu-to-ba女士表示，bē-tàng接受中國對捷克的威脅，斯洛伐克會kah捷克徛作夥。
七月二十，立陶宛接受咱國的建議，佇首都設立代表機構，名稱叫作「駐立陶宛臺灣代表處」，che是佇中華人民共和國的邦交國中，以「臺灣」的名設處的頭一個。八月初十，中國召回駐立陶宛大使，原因是立陶宛同意台灣以家己島嶼的名設立實質上是大使館的代表處。「台灣代表處」惹中國真受氣，「中國政府對chit件代誌堅決反對，中國決定召回駐立陶宛大使，要求立陶宛政府召回駐華大使。而且中斷直達立陶宛的鐵路貨運，作為經濟制裁。問題是中國每年對立陶宛出口14億美金，立陶宛對中國出口4億美金，m̄知啥人制裁啥人。受氣的時所做的決定，往往是愚戇的。
美國最近有teh考慮beh kā咱國駐美代表處正名作「台灣代表處」，足快受氣的中國，m̄知是m̄是會照對付立陶宛的方式對付美國？咱真好奇。