二月初六透早4點17分震央佇土耳其南部kah敍利亞邊界的所在，發生規模7.8超強大地動，深度干單17.9公里，現知有幾千人死亡kah受傷，加上餘震無停，相信死傷人數會一直增加，想起1999年921大地動的時，土耳其tī第一時間派遣救搜隊來台灣提供援助，咱國消防署隨時透過外交部連繫，確定beh派遣「台灣國際搜救隊」前往土耳其救援，第一梯次40人、3隻搜救犬kah大批搜救器具，搜救隊由外交部長吳釗燮、內政部長林右昌授旗了後，初六暗搭十點30分班機出發。第二梯次派遣90人、2隻搜救犬kah大批搜救器具、醫療藥品，搜救隊由行政院長陳建仁授旗了後tī二月初七出發。
第一梯次40人搜救隊tī 二月初八中晝tio̍h到重災區，kah美國、捷克、波蘭等國做夥執行搜救行動，m̄-nā美國CNN特別報導，英國BBC IG貼文封面相片tio̍h是夯國旗的台灣搜救隊。頂面寫講：地動了後，ùi世界各所在來土耳其kah敍利亞的各國搜救隊.。聯合國mā kā咱國搜救隊正式列佇官方網站，標名是「台灣（Taiwan）搜救隊」。
送溫暖去土耳其，台灣人kā各種賑災物資送到土耳其駐台辦事處內湖倉庫已經濟kah滿出來，辦事處趕緊喝停。土耳其媒體大篇報導「台灣無bē記得1999年921大地動的時，土耳其的幫忙」，而且大大謳咾蔡英文總統kah濟濟的行政首長捐款善舉。衛生福利部二月15公布，開放賑災專戶累計統計到14下晡5點為止，已經有總計捐款13萬8,696筆、新台幣6億8,224萬外元。
各國救難隊相續撤退，內政部消防署mā決定搜救隊撤離。為tio̍h繼續協助土國受災民眾，kah為tio̍h未來可能潛存的震災做準備，台灣搜救隊tī二月十四
撤出災區前，kā所帶來的4噸搜救裝備器材，贈送hō͘土國搜救隊（AKUT），同時教導、指導使用方法；台灣搜救隊預定會tī二月十五回國。
真的，台灣會tàng幫忙（TAIWAN CAN HELP）
中國電子媒體「微博」偷用台灣搜救隊出發前的相片，寫講：土耳其地動，中國台灣隊chhōa頭出發！中國台灣地區第一批次40名特搜隊員kah三隻救援狗，二月初六暗出發前往土耳其地動災區。相關負責人表示，台灣tī 921地動的時，土耳其救援隊是上早到位的國際救援隊。Chit遍土耳其有災難，阮台灣來鬥相仝。
台灣是台灣，中國是中國，講啥物「中國台灣隊」。Phúi！Phúi！Phúi！中國實在有夠bē見笑！