中國烏白放聲會hông驚!

 六月初六早起七點半,美國聯邦參議員達克沃絲、蘇利文kah昆斯坐美軍運輸機C-17訪問台灣,停留三點鐘的中間宣布美國beh贈送台灣七十五萬劑疫苗,全台灣的人攏真歡喜心存感謝。但是咱若想起中國按怎放聲,咱實在心驚驚。因為載inchit台美國空軍戰略運輸機C-17「空中霸王」,是1979年台美斷交以來,第一台正式佇台灣降落起飛的美國軍機。

 舊年2020年八月三十一,中國共產黨黨報《環球時報》發表一篇「需要hō͘蔡英文當局一個根本性的警告」的社評講,設使台灣kah美方若已經做了美國軍機佇台灣起落的安排,che是非常嚴重的代誌,已經踏tio̍h(中國)大陸維護國家統一的紅線,「若是(中國)大陸有掌握tio̍h明確的證據,tio̍h會tàng破壞掉歸個機場kah降落佇該機場的美國軍機,台海戰爭tio̍h按呢拍起來」社評koh講,再次警告蔡英文當局kah美國:m̄好sńg火。(中國)大陸維護國家主權kah領土完整的意志十分堅定,中國無想beh相戰,但是對公然製造分裂國家現實的hiah-ê行為,「(中國)大陸一定堅決kā伊回擊。」若有掠tio̍h美軍飛機佇台灣起落,(中國)大陸派戰機去台灣宣示主權koh khah是順理成章。

  Mài講咱台灣會驚,連美國mā會chhoah。Chit遍三位美國聯邦參議員六月初六beh來台灣,早早tio̍h決定好,而且安排坐美國空軍運輸機C-17來,為tio̍h確保歸個任務的完全性,美國印太司令部特別安排美國航空母艦雷根號戰鬥群,早早tī五月二一tio̍h ùi日本Yokosuka基地出發來到台灣東部外海巡弋(e̍k),頂面有屬美國海軍第五艦載機聯隊以外,猶有載千外噸的軍械、五千外名官兵kah六十台戰機,隨時會tang應付任何情勢的變化。除了作預防萬一的準備以外,mā有警告中國m̄-thang濫摻的意味。

  果然有效。六月初六hit工中國恬chiⁿ-chiⁿ攏無出聲,連逐工來台灣西南海域報到的中國軍機mā放假一工無來。第二工,中國外交部才發表聲明講,美國軍機載三位參議員去台北是嚴重違反一中原則kah中美三公報,中方對che「堅決反對」,會制裁chit三個人,而且已經向美方提出嚴正交涉,敦促美方慎重處理,m̄-thang向台獨分裂勢力發出任何錯誤的信號,以免嚴重損害中美關係kah台海和平穩定。《環球時報》發表社評講,bē-tàng hō͘美台用切煙腸的戰術實現「新的突破」,若按呢繼續落去,美國有一工會切tio̍h家己的指頭仔。

  叫美國切煙腸小心m̄-thang切tio̍h指頭仔,講chit類的笑話無啥要緊,拜託中國mài koh烏白放聲講按怎tio̍h beh相戰,會hông驚neh!