八月初二，美國聯邦眾議院議長Phe-lo-si（Nancy Pelosi）順利chhōa團訪問台灣，中國阻擋無效，見笑轉受氣，ùi八月初四中晝到初七中晝，佇台灣四箍圍六個海域進行飛彈實彈演習了後，佇中國各海岸實施實彈演習。Chit中間，中國開始用無人機擾亂金門列島：八月初七暗頭一隻中國無人機飛來金門擾亂，第二暗koh飛來一隻。八月初九暗一隻無人機飛來石碇島，八月十六下晡一隻飛來二膽，國軍用石碩kā khian，無人機有翕tio̍h chit-ê鏡頭，佇中國的網路一直播出。八月二七，一隻無人機飛來烈嶼，八月二九下晡，一隻無人機飛來獅嶼。中國無人機飛來金門列島那像teh行灶腳。
八月二九。中國外交部記者會，有記者問起中國無人機飛去金門翕相chit件代誌，中國外交部發言人趙立堅講，「中國的無人機佇中國的領土頂頭飛飛一下，有啥物值得大驚小怪？」仝一日，台北市長柯文哲講「我bē失氣（sit-khùi）kah用石頭khian無人機，早tio̍h夯銃kā拍落來。」人問講，若是你做總統敢會kā共機拍落來？柯文哲應講:：「我會bē m̄知，但是小英確定無法度。」
八月三十下晡，蔡英文總統視導海軍146艦隊了後致詞，指出近來中國解放軍軍演了後用無人機侵擾等「phú色地帶」衝突的手法，伊呼籲逐個「敵軍愈（lú）是挑釁，咱tio̍h愈冷靜。咱bē hō͘對岸有不當的藉口來製造衝突，咱bē挑起戰端，咱自我克制，但是並m̄是表示咱bē反制。」伊已經下令國防部，tī適當的時陣採取必要而且強koh有力的反制措施，捍衛國家領空的安全。
八月三十下晡五點59分，一隻中國無人機飛來二膽，國軍警告無效，開銃kā拍無拍tio̍h。Che是「八二三砲戰」1979年正月初一正式停火43年後，金門國軍拍的第一銃，引起國際關心。第二工中國網路有播出chit-ê畫面，koh加播出一個中國作穯人the̍h一塊田塗kā無人機khian落來的畫面，teh笑台灣軍人的水準tio̍h是按呢nā-nīa。九月初一中晝十二點3分，一隻中國無人機飛來金門獅嶼，國軍示警驅離無效了後開銃kā拍落海。中國國台辦發言人朱鳳蓮講：「民進黨藉機會炒作，製造緊張氣氛，升懸兩岸對立對抗，真正離經好笑。」
九月初二新聞，國軍已經kā 40支無人機干擾銃送到外離島，軟的硬的戰法做夥來：先拍無人機干擾銃，破壞伊的GPS系統，那像囝仔時代看歌仔戲武場的「定身法」，點落去、對方惦惦bē振動，咱才看beh按怎kā處理。總講一句tio̍h是hō͘中國無人機有來tio̍h無轉去，盡量hō͘朱鳳蓮繼續笑、笑bē煞。
中國無人機實在是皮chhiūⁿ，欠拍！