一月十三，民進黨候選人賴清德kah副總統候選人蕭美琴當選台灣第16任總統副總統。世界各國相續向咱恭喜：有25個歐盟kah歐洲國家超過200位政要表達祝賀；包括英國外交大臣卡梅倫、立陶宛外交部長藍斯柏吉斯，以及法國、德國、義大利外交部mā tī一月十四日kā咱祝賀，其他地區包括日本外務大臣KamikawaYōko（上川陽子）一月十三暗代表日本政府祝賀賴清德當選。

美國國務卿布林肯聲明恭喜賴清德當選。一月十四透早，新加坡外交部祝賀賴清德當選總統，澳洲外交kah貿易部祝賀賴清德當選總統。法國國民議會議長彭佩美，英國國會下議院外交委員會主席克恩斯，立陶宛國會議長希米利特，波蘭參議院副議長卡敏斯基，歐盟透過對外事務部攏即時向咱國表達祝賀。真難得的是第一遍有kah咱無邦交國家的總統出聲祝賀，頭一位是捷克總統帕維爾祝賀咱國順利完成民主選舉。第二位是菲律賓總統小馬可仕，一月十三暗祝賀賴清德當選後一屆台灣總統。中國外交部發言人除了抗議以外，koh叫小馬可仕總統tio̍h加讀一寡冊。猶有真濟賀電講bē完。中國的反應攏仝款：向某國表達強烈不滿，某國嚴重違反一個中國原則，向「台獨」分裂勢力發出嚴重錯誤訊號，中國對che強烈不滿、堅決反對，向某國提出嚴正交涉。

一月十四早起，中國駐日本大使館發表聲明表示，「台灣地區選舉結果了後，日本外相公然表示祝賀。中國抗議以外，koh講台灣是中國的台灣，台灣地區選舉是中國內部事務。嚴肅敦促日方深刻反省侵台歷史，bē使向『台獨』勢力發出任何錯誤訊號，bē使kā台海和平穩定kah中日關係製造干擾。」

    咱beh叫中國大大細細的官員tio̍h加讀一寡冊。台灣是台灣人的台灣，kah中國一點仔關係都無。中華人民共和國m̄-bat管過台灣一工，講「台灣地區選舉是中國內部事務」完全無常識！台灣選舉若是中國內部事務，借問中國十四億人敢有一張台灣選票？講「阮嚴肅敦促日方深刻反省侵台歷史，」實在是胡言亂語！1894年七月二五發生「日清戰爭」（中國講「甲午戰爭」），清國戰敗，1895年四月十七以簽署《馬關條約》作結束，割讓臺灣島、澎湖群島kah臺澎附屬各島嶼hō͘日本。日本自了m̄-bat侵略過台灣，beh叫日本按怎「深刻反省侵台歷史」？上好笑是，中國足愛講台灣是中國神聖領土不可分割的一部分。事實上講割tio̍h割、講讓tio̍h讓，偌神聖？家己無讀歷史beh騙siáng！

　　中國目睭金金直直相台灣，那像猶真勇健，但是你若聽中國政府大大細細官員所講的話，實在是病kah不止無輕鬆。原來中國是目睭金金人傷重！