八月二八，中國自然資源部發布「2023年版標準地圖」，內底包括西沙群島kah南沙群島，koh kā原本的南海「九段線」（Tio̍h是ùi台灣南旁的巴士海峽向南沿菲律賓西部海岸畫落去，沿婆羅洲北部海岸了才向西北，沿越南東部海岸向西北畫到海南島南旁為止，親像一塊牛舌形），擴張到台灣東部海域成作十段線，kā台灣畫入去，甚至kā日本的釣魚台畫入中國的版圖。中國「微博」大聲講：「中國地圖一點一線都bē使錯」，「地圖一點一線攏代表祖國大好山河」。
八月三十一，台灣外交部回應《日經亞洲》查詢的時表示：「中華民國台灣是一個主權獨立的國家，不隸屬佇中華人民共和國。中華人民共和國自了m̄-bat統治過台灣。Che是事實，mā是國際社會普遍接受的現況。無論中國政府按怎扭曲對台灣主權的主張，攏無法度改變中華民國台灣存在的客觀事實。」八月三十一，菲律賓外交部聲明表示，「最新一件試圖合法化中國對菲律賓領土、海域主權kah管轄權的主張，並無符合國際法，特別是1982年聯合國大會決議的海洋法公約（UNCLOS）」，呼籲北京當局展現負責任行徑，遵守海洋法公約kah 2016年「南海仲裁」否決中國九段線的裁示。八月三十一暗，越南外交部發言人以書面回覆媒體詢問表示，中國chit-ê行為侵犯tio̍h越南對西沙群島kah南沙群島的主權，猶有1982年聯合國海洋法公約（UNCLOS）所確立越南對所屬海域的主權、主權權利kah管轄權。八月三十一，印尼外交部長勒特諾（Retno Marsudi）就中國新地圖併吞印尼領土向中國提出抗議，伊表示，劃線抑是做任何主張攏tio̍h符合1982年聯合國海洋法公約。八月三十一，馬來西亞外交部發表聲明講，中國最新發布的地圖kā馬來西亞的疆土畫入去，馬來西亞bē-tàng承認chit款的主張。
中國褪褲圍海猶bē煞，koh褪褲圍山。印度kah中國有爭議的邊界超過3,488公里，其中，印度實質治理中的阿魯納查省（Arunachal Pradesh），中國稱作藏南地區；另外大部分地區目前是由中國有效控制的阿克賽欽（Aksai Chin），mā攏畫入去中國新地圖。八月二九下晡，印度外交部發言人巴格奇（Arindam Bagchi）發表聲明講，中國所謂的2023年標準地圖kā印度領土畫入去，印度已經透過外交管道向中國提出「強烈抗議」。印度外交部長蘇杰生（Subrahmanyam Jaishankar）強烈回應講，kā別國的領土畫入去家己的地圖，已經是中國久年的老習慣，chit種作法無法度改變事實。
奇怪，中國褪褲圍海koh圍山，那會無愛歸氣褪褲圍地球，敢無khah爽？