過去千外工中國對全球關掉邊境，中國人遭受tio̍h封鎖、bē-tàng出國的苦難。中國政府宣布ùi 2023年正月初八起，正式開放邊境，真濟中國人歡喜會使出國。但是干單聽tio̍h chit-ê放毒去外國的消息，hō͘全世界各國神經繃ân-ân，至少有21國相續設定「邊境管制措施」，beh防止阻擋武漢肺炎變異株入侵。十二月二七，中國外交部講，中國政府一直攏是以「科學防疫」，各國對新型冠狀病（武漢肺炎）病毒防疫措施mā應該「用科學精準原則」，「抵好tio̍h好，無應該過頭」，影響人員的正常往來。
世界各國那會hiah緊張？因為自從2020年春天，武漢肺炎ùi中國放出去全世界了後，ùi上起初的Alpha變身作Beta，一直變身，到Delta全世界大緊張，上新的Omicron各種變異株koh-khah厲害。好佳哉chit中間有各種疫苗研究成功，注一針無夠力，注兩針注三針注四針。一月，咱政府鼓勵老大人緊koh加注「次世代疫苗」，驚二、三月Omicron變種病毒會大流行。按呢chiah認真防疫，全世界到2022年十一月初七為止，有6.37億人確診、660萬人死亡。中國khah特別，堅持清零、封城，自認為中國研發出來的疫苗世界一的，事實上到Delta tio̍h無伊法ah，mài講路尾的Omicron各種變異株變異株。而且注疫苗的比率mā傷低，真濟人確診了mā無好好治療，致使各種病毒的變異株亙相影響產生新的病毒，加上中國內疫情完全失控的時忽然間開放，完全無配套的措施，各大都市的病院急診患者爆滿，不幸死亡的人濟kah火葬場bē赴燒。中國國內當teh大流行的時陣，忽然間開放中國人出國，世界各國那會bē驚？
真濟國家規定ùi中國飛來的旅客，tī登機進前tio̍h提供新冠檢測陰性證明。有的國家特別規定ùi北京、上海來的旅客落飛機tio̍h koh做PCR採檢。上厲害的是美國kah德國，早早tī 2022年十二月十五、十六，相續停止中國人的簽證，斷掉源頭，m̄知減少幾萬中國人去in國放毒，實在有夠巧。一月初十，日本kah韓國mā決定暫時停止中國人去in兩國的簽證，中國外交部隨時反應，停止日本人kah韓國人去中國的簽證。Khah趣味的是，美國kah德國宣布停止中國人簽證的時，那像無聽tio̍h中國hng一聲。Kah中國一粒一的非洲國家Morocco規定ùi 一月初三開始禁止所有中國來的班機降落，上猛的是中國的兄弟國北朝鮮，一月初一開始禁止中國人入境。攏無聽中國講按怎。
世界各國對中國旅客採取嚴格檢測措施，中國罵講是「歧視性限制」，但是世界衛生組織直剥講m̄是歧視，是因為中國疫情訊息無透明，會hông驚。