中國真濟所在堅持一工做兩遍核酸檢測，看你是陰性抑是陽性反應，若陽性tio̍h強制送去完全無治療的方艙病院，動bē-tio̍h to̍h封chit-ê城、封hit-ê市，實在真好笑。工廠停工、工人無工做，商店關門，舞kah全國人民食bē消、擋bē-tiâu，十一月四界發起「白紙革命」作無言的抗議。十二月初，中國政府忽然間態度大se̍h彎，無beh koh堅持「動態清零政策」，大大放鬆防疫措施。北京真濟設置佇人行道頂面的「核酸採樣亭」已經無去ah。
有專家分析，按呢有可能會面臨大規模的感染，民眾煞四界買退燒藥，民眾指責有藥店囤積感冒退燒藥無beh賣。十二月十三，《紐約時報》報導，佇北京上富裕的朝陽區一間病院外口，十二月初九，tī差不多攝氏零度的寒冷氣溫下有將近100人排隊teh等待發燒門診，佇病院等beh領藥的人tio̍h排隊排5點鐘。有北京市民溢去藥房搶買藥仔，北京市藥房的退燒止疼藥攏賣kah空空。
Chit波囤藥熱mā發燒到香港，有香港市民幫忙掃貨寄去中國，造成香港藥房mā欠貨。香港醫務衛生局局長盧寵茂呼籲，無需要囤傷濟藥物，mā無必要頭過反應。台灣mā有人那像siáu-ê買退燒、止疼、消炎、綜合感冒的藥品，寄去中國，銷售量增加四、五成，藥房的人講，驚按呢會造成台灣的藥品大欠貨。
十二月十三，中國國民黨主席朱立倫講：「中國若需要醫療資源，政府應該盡力協助，mā對緩和兩岸氣氛有幫助。」前立委陳柏惟kā彈倒轉，伊講：
自從疫情thòa到全世界以來，中國國民黨tio̍h一直批評咱中央防疫無夠力，一路以來的論述攏是台灣防疫表現誠bái誠差，「為啥物tī chit-ê時陣主張台灣若是醫療資源有夠額tio̍h應該協助中國？」第二，中國國民黨立法院黨團今年五月有開記者會，表示tio̍h關切醫療人員tī疫情下的壓力，講醫療人員差不多beh崩落去，「若是真正關心醫療人員、防疫人員的辛苦，是按怎會認為中國若有需要，台灣tio̍h應該協助中國醫療資源咧？為啥物一句『中國需要』，tio̍h叫咱台灣的醫療人員去付出，白白增加台灣醫療的風險kah工作量咧？」陳柏惟引用中國十二月十二公布的疫情數字，中國hit工新增加確診的病例干單2,315例。「若是真正chiah呢厲害，為什麼會需要台灣醫療資源的協助？若中國官方新增病例的資料是真的，tio̍h是chiah呢少，為什麼會傳出搶藥寄送中國的消息？陳柏惟減講一句，十二月十二咱台灣確診人數是10,824例，確診例是中國的四倍六，是按怎確診例khah濟的台灣tio̍h支援確診例khah少的中國醫藥咧？
中國鸚哥鳥若koh teh講話，拜託逐個mài kā聽！