六十幾年前讀東海大學的時，有一位外國老師教阮唱一首歌：《任何人都m̄是一個孤島》（No Man is an Island）會記得歌詞講：「任何人都m̄是一個孤島，任何人都無孤單。別人的歡喜是我的歡喜，別人的悲傷mā是我的悲傷。逐個互相需要，保護你tio̍h是照顧我家己，逐個那像兄弟，逐個攏是朋友。」
任何人都m̄是一個孤島，何況一個國家。
2022年二月二四，俄羅進軍侵略隔壁國烏克蘭到taⁿ已經四百外工，俄羅抵抵拍烏克蘭的頭一個月，烏克蘭孤單奮戰那像無人插伊，等到美國等北約國家開始援助各種新型武器裝備了後，烏克蘭才士氣大振、愈戰愈勇。無半年，咱千想萬想mā想bē到chit場戰爭會hō͘非洲幾個國家哀父叫母。因為戰爭致使烏克蘭chit-ê世界糧倉無法度出口糧食去非洲。好佳哉，舊年七月二二，聯合國、俄羅、土耳其kah烏克蘭有促成「黑海穀物倡議」，允准經由黑海「海上人道主義巷路」，ùi烏克蘭的三個主要港口向世界各地出口穀物kah其他食物。有小可緩解部分壓力，但是俄羅浮丁總統一再暗示無beh koh繼續。Ùi按呢咱知影烏克蘭原本tio̍h m̄是一個孤單的國家，有真濟非洲國家等待伊的糧食供應。
六月十四，非洲獅子山比奧（Julius Bio）總統呼籲俄烏雙方共同努力結束戰爭，這場戰爭已經致使非洲大部分地區的食物價數大起。今年beh拼連任的
比奧總統，比啥人都khah關心國內的經濟穩定。六月十六，由塞內加爾總統薩爾kah南非總統拉馬福薩chhōa團的非洲和平代表團到烏克蘭，成員包括南非、塞內加爾、尚比亞、葛摩聯盟的總統kah烏干達、埃及等國的高級官員。In飛到基輔了後，烏克蘭先安排in前往布查親目看俄羅軍屠殺的證據，然後才kah澤倫斯基總統會談。六月十六khah òaⁿ轉往俄羅聖彼得堡，六月十七kah俄羅總統浮丁會談。Chiah-ê非洲領導人呼籲透過外交手段和平談判來解決烏俄衝突，佇初步階段會提出一系列「信任建立措施」，包括呼籲俄羅撤軍，以及解除對俄羅的制裁。無閒作in無閒，但是咱相信in chit遍的成果有限。
原本佇烏俄戰爭中一直保持中立的非洲國家，那會相招去烏克蘭kah俄羅做和平使者咧？當然是為tio̍h家己的人民生活。因烏俄戰爭kā全球糧食供應攏拍亂去，食物價格起價愈雄，致使非洲原本tio̍h有的枵餓危機koh khah嚴重。
任何人都m̄是一個孤島，任何國家mā無應該孤單，我無的物資你賣我，你無的物資我供應hō͘你，國kah國之間和平鬥陣敢m̄是誠好？
任何人都m̄是一個孤島，任何國家mā無應該孤單！