你是beh作家己的主人?抑是作人的奴隸?

 舊年(2019)是中共《Hō͘台灣同胞的批》發表40週年,中國國家主席習近平一月初二出席紀念儀式的時有發表談話。習近平除了再次宣誓和平統一、一國兩制的方針以外,koh重新定義九二共識是「共同努力謀求國家統一」,刣掉一中各表的空間。同時,習近平強調並無承諾放棄使用武力,保留一切的選項。習近平頭一遍提出「一國兩制台灣方案」,bóng來探看台灣有啥反應。

 隔壁國的國家主席那會hiah大膽敢講chit種氣死人的話?因為伊看2018年十一月二四台灣「九合一大選」,執政的民進黨大輸,m̄-nā縣市長輸kah chhung無三分之一,六都輸kah chhung兩都、各縣市議會mā輸kah悽慘落魄。In看民進黨失去民心,好凌遲。無疑誤一向hông看作軟chiáⁿ的蔡英文總統隨時kā彈倒轉去,雖然禮數原在,伊先以「中國國家主席」來稱呼習近平,而後才指家己身為中華民國總統,beh說明立場。伊講:阮自了m̄-bat接受過「九二共識」,台灣絕對bē接受「一國兩制」,絕大多數的台灣民意mā堅決反對「一國兩制」,這mā是「台灣共識」。中國絕對無想tio̍h絕大多數的台灣人會大聲拍pho̍k仔,謳咾蔡英文總統自了m̄-bat chiah勇過、chiah猛過,講蔡總統是khioh ti̍ioh銃!伊的人氣自按呢慢慢仔koh倒轉來。

  香港發生「反送中」運動,蔡英文總統即時隔海kā in贊聲支持。2019年十月初五香港政府頒布《禁蒙面法》,禁止遊行掛「嘴掩」華語叫作「口罩」,違反者tio̍h坐監六個月抑是罰款一萬港紙。十一月初九,香港高等法院宣判《禁蒙面法》違憲無效。北京的中國全國人民代表大會法制工作委員會發言人隨時批評香港法院挑戰人大權力,態度粗暴。香港法院講的無準算。

  原本中國kā香港準作實施「一國兩制」的「見本櫥」beh來誘拐台灣。台灣看tio̍h香港chit款的「一國兩制」驚mā死!香港人bē-tàng選家己的行政長官(特首),家己的高等法院講的話無效,人民示威遊行tio̍h kā in拍「催淚彈」、chōaⁿ番薑仔粉,街頭變作戰場、大學變作煉獄。差一點仔tio̍h親像掠新疆的「維吾爾人」去思想改造。無相信台灣人看了bē驚bē煩惱!

  咱tio̍h寶惜正月十一chit場總統kah立法委員的選舉,假使蔡英文總統kah民進黨立法委員選輸去,抑是干單嬴一屑屑仔,中國共產黨當然會想講是台灣人,khah合意中國國民黨的韓國瑜kah吳思懷、邱毅chit類親中國的政治人物,中共的手tio̍h會完全無客氣,大大方方伸入來台灣,修理kah hō͘你叫m̄敢。

  借問一下,你是beh作家己的主人?抑是作人的奴隸?你家已選擇!