五月十七，中國國民黨徵召新北市長侯友宜參選總統，美國《紐約時報》隨時報導，中國國民黨前兩遍總統大選失利的關鍵因素，是主張兩岸加強交流。北京對台灣步步進迫致使選民煩惱的時，中國國民黨kā koh再執政的希望寄託佇一位出身警界、受選民歡迎、佇兩岸議題頂面那像一張白紙，伊對中國的看法茫茫渺渺。「華爾街日報」特別強調，中國問題是台灣總統大選的核心議題，侯友宜對中國問題採取的立場基本上是會閃tio̍h閃。
十一月二四早起，中國國民黨侯友宜決定kah副手趙少康聯合出戰，侯友宜強調伊kah趙少康的政見大部分仝款、干單小部分無仝，不過選戰一切「以總統參選人作主體中心」。趙少康隨時接落去講，「侯市長提出來的真濟政見攏是我的。」中國國民黨提名的總統參選人無政見，到底beh kah人比啥？
新聞報導：十一月二六，侯友宜替藍營立委參選人李彥秀徛台的時感謝趙少康，講「人生tio̍h是講信用。兄弟講thīn你tio̍h thīn你，伊講藍白會tàng合tio̍h合，bē tàng合伊mā會相thīn！」續落去伊那像是teh暗唱柯文哲，「M̄驚死的人抵tio̍h hit-ê bē見笑的人，bē見笑的人一定會死。」無代無誌hông彈tio̍h銃的柯文哲，第二工回應講：「無要緊lah，伊（侯友宜）應該會講伊失言！」哈哈笑一聲。兩工後侯友宜才澄清講，「我是講民進黨lah」，無teh講別人。
原來，無啥thang比的侯友直，想beh kah民進黨比bē見笑！中國國民黨bē見笑是世界一的，siáng敢kah伊比？「藍白合」協議中，一個堂堂百年大黨的中國國民黨bē見笑kah要求一個小小的民眾黨，比民調的時tio̍h讓伊3%！選都猶未選舉，「藍白合」協議tio̍h拍派啥人作啥物部長，那像賊仔土匪teh分贓。十一月二三，民眾黨主席柯文哲良心發現，講「藍白合」六條協議恐驚有違反「期約賄選」。無良心的中國國民黨當然m̄知影啥物叫作bē見笑。
無啥thang比的侯友宜，十一月二六講，「啥人會比我khah愛台灣？賴清德敢會比我khah愛台灣？」啥人khah愛台灣m̄是親像侯友宜所罵的：「賴清德用嘴愛台灣，我是用行動愛台灣、用生命顧台灣！」十一月二七侯友宜講，伊若當選總統beh大量開放中國旅客、中國學生來台灣讀冊koh就業，按呢來刺激台灣經濟。今年一月至六月，中國青年（16至24歲）的失業率平均是19.58%，六月21.3%是歷史上第一懸。今年一月至六月，咱台灣青年失業率平均是11.44%。侯友宜愛台灣愛ùi中國去、煩惱中國青年失業率傷懸、愛台灣愛kah嫌台灣青年失業率傷低，按呢敢是teh愛台灣！？