根據美國《CNN》的報導，六月十三，俄羅總統浮丁指出，俄羅軍佇「特別軍事行動」（侵略烏克蘭戰爭）的過程中欠缺真濟物件，包括精確導引彈藥、通信設備、飛機kah無人機等．「阮雖然有chiah-ê物件，ùi數量上來看猶無夠濟。」針對按怎結束烏俄戰爭，浮丁認為，西方國家干單停止供應武器kah裝備hō͘烏克蘭，chiah呢簡單tio̍h解決問題。
2022年二月二四，俄羅入侵烏克蘭hit當時，俄羅看烏克蘭人少兵弱，臭彈四工內烏克蘭tio̍h會投入俄羅的胸前。事實上烏克蘭孤軍奮戰，當然mā有心beh求和，致使戰爭爆發二十工的三月十四，兩旁已經和平談判四遍。美國等北約國家hō͘烏克蘭人愛國的精神感動tio̍h，而且看tio̍h俄羅提出的停戰條件傷過酷刑。俄羅向烏克蘭提出六個條件，第一條，烏克蘭tio̍h放棄加入北約，保持中立地位，俄羅願意成作烏克蘭安全的保障者。第二條，俄羅語成作烏克蘭第二官方語言地位，取消任何對俄羅語的限制。第三條kah第四條，承認頓內茨克kah盧甘斯克的獨立，承認俄羅對克里米亞半島的主權。第五條，烏克蘭去納粹化kah禁止極端民族主義，廢除現有美化納粹kah新納粹的法律。第六條，烏克蘭的非軍事化，完全放棄進攻性的武器。美國等北約國家實在看bē落去大國按呢凌遲小國，才開始出手援助各種新型武器kah裝備。
戰爭已經過了120個四工，俄羅佇烏克蘭所佔的土地顚倒愈佔愈細塊。而且烏克蘭佇美國等北約國家援助koh khah濟koh khah新的武器kah裝備，最近開始大反攻。Chit遍換烏克蘭開條件，第一，要求俄羅軍完全撤出烏克蘭。第二，tio̍h算數，俄羅軍來烏克蘭境內相戰，除了tio̍h賠償相當大筆的軍費以外，烏克蘭的各種基礎建設包括水霸、發電廠、病院、學校、住宅的重建攏需要錢。那像去人兜相拍，人兜的家具桌椅門窗拍歹去，煞免賠人？第三，chit遍hō͘俄羅侵佔的顿內茨克、盧甘斯克、扎波羅熱kah赫爾松四州攏tio̍h歸還烏克蘭。2014年俄羅非法侵佔的克里米亞半島mā tio̍h還hō͘烏克蘭。最後一點懲處戰爭罪犯—浮丁。Chit點現此時猶是俄羅總統的浮丁絕對無可能接受。
除了俄羅總統浮丁家己講的，武器裝備無夠好、無夠濟以外，上嚴重的是軍心，烏克蘭的軍人知影是為tio̍h保護家己的國土家園來戰，俄羅軍為tio̍h侵略別國，去別人的土地相戰，那會有軍心士氣？所以最近俄羅軍出現一種「督戰隊」佇第二線，有七名俄羅軍人ùi第一線撤退走入樹林，隨時hō͘三名「督戰隊」成員夯銃掃射拍死。俄羅侵略烏克蘭注該會輸，實在戰bē落去ah！