俄羅做賊,koh teh喝掠賊!

五月十三,俄羅外交部長拉夫羅夫(Lavrov)去中亞的塔吉克(Tajikistan)參加「獨立國家國協」(CIS)會議,佇會後的記者會伊開砲指控「歐盟」有「侵略性」koh「好戰」。原本二月二四俄羅入侵烏克蘭的理由是烏克蘭想beh加入「北大西洋公約組織」簡稱「北約(NATO)」,但是戰爭以後,烏克蘭一直強調in無可能成作「北約」的成員,但是猶原會大力推動申請加入「歐盟」。敢是按呢俄羅外交部長才會罵「歐盟」抵數?

Ui俄羅外交部長講chiah-ê話,咱tio̍h知影伊胡言亂語。「歐洲聯盟」,簡稱「歐盟」,是歐洲多國共同建立的政治kah經濟聯盟,有27個成員國。相信伊原本beh罵的是「北約」,因為「北約」是歐洲kah北美洲國家為實施防衛合作所建立的國際組織,有大量核武器kah常設部隊,是西方的重要軍事力量。「北約」成員國有30個。北約軍事開支佔世界國防開支的70%以上。

  咱來看到底是啥人有「侵略性」koh「好戰」?二月二四,俄羅出兵入侵烏克蘭,放調九十六點鐘、也就是四工內完全佔領烏克蘭,派兵派戰車派戰機派戰船侵佔隔壁國烏克蘭的領土,按呢敢無算是有「侵略性」koh「好戰」?

  戰爭抵開始的時,「北約」國家會使講是惦惦仔看,無一個國家伸手支援,一直看烏克蘭孤軍奮戰、俄羅大軍入侵、欺人太甚,「北約」才一個一個運送上新上好的武器支援烏克蘭,hō͘烏克蘭愈拍愈勇。到今仔日為止,「北約」猶無派一兵一卒去贊烏克蘭,所有的戰果攏總是烏克蘭全體軍民愛國衛國的英勇表現。好笑的是俄羅煞怪「歐盟」有「侵略性」koh「好戰」。

  到五月十九為止,俄羅軍已經陣亡約2萬8,500外人,烏克蘭軍摧毀俄羅軍1,254台戰車、3,063台裝甲車、595門火砲系統、199台多管火箭車、93組防空系統、202隻軍機、1,167隻直升機、2,157台各式車輛kah油罐車、13台艦艇、455隻無人機、43個特殊設備kah 103粒巡弋飛彈。俄羅陸海空軍chiah呢慘重的損失,敢是俄羅軍為tio̍h保衛家己的國家,不幸佇俄羅境內hō͘有「侵略性」koh「好戰」的「北約」軍隊所拍的?當然m̄是!

Che是五月十九下晡烏克蘭國防部公布上新的戰果統計,烏克蘭國防部講,自從俄羅二月二四入侵至五月十九透早為止,烏克蘭所公布上新的戰果。內底確實有真濟「北約」國家所支援的各種上新的武器,但是戰果攏是烏克蘭英勇的軍民一件一件建立的。當然是足無簡單。

    咱看tio̍h俄羅做賊,koh teh喝掠賊!