八月初二，美國聯邦眾議院議長Phe-lo-si（Nancy Pelosi）chhōa團訪問台灣前，中國外交部發言人趙立堅講：「Phe-lo-si眾議長若是去台灣，tio̍h是對中國內政的粗暴干涉，中國人民解放軍絕對bē惦惦無管。」甚至有人唱聲，美軍戰機若護送Phe-lo-si訪台，解放軍若kā伊驅離無效tio̍h會使kā伊「拍落來」。結果是Phe-lo-si議長安然來台灣訪問平安離開。中國見笑轉受氣，ùi八月初四中晝到初七中晝，佇台灣東西南北周邊六個海域進行飛彈實彈演訓，包圍打台灣。
八十歲以上的台灣人，攏一定會記得囝仔時代的一首軍歌《保衛大台灣》，裡底一句歌詞hō͘我印象上深的是「我們已經無處後退，只有勇敢向前。」那會按呢？意思是講若猶有所在thang退，一定koh退。幾年前看《李敖大全集》才知影，原來中國國民黨軍是撤退專家，大全集內底有一篇文寫講：方豪神父kā我講，tī國民黨兵敗山倒四界逃亡的時，伊佇廈門的《中央日報》看tioh有一個標題是：「我軍一撤千里，共軍追趕不及。」意思是講我軍一下撤退歸千里，共軍khah jek mā jek bē tio̍h。原本中國國民黨軍計晝撤退到長江以南tio̍h會使，無疑誤撤退傷緊，撤ùi四川去，看m̄是勢，緊向南撤退，撤到廣東猶bē煞，緊撤退去海南島，離雷州半島傷近無穩，路尾才撤退來台灣，隔一個台灣海峽，共軍猶無海軍thang拍台灣。講真的，chit首軍歌《保衛大台灣》歌詞有夠老實：「我們已經無處後退，只有勇敢向前。」若猶有所在thang退，當然會koh繼續退。唱無一年，可能有人認為按呢唱無好，散播失敗主義論調，才改作「我們已經準備好了，只要勇敢向前。」過無偌久，聽講chit首軍歌唱起來那像是唱「包圍打台灣」，煞變作禁歌、不准唱！
中國的飛彈「包圍打台灣」了後，四界實彈軍事演習，軍機軍艦刁工來倚近、甚至超過海峽中線，kah倚近、甚至超過西南航空識別區來擾亂。Chit-ê時陣，中國國民黨主席派副主席夏立言chhōa團去中國訪問，大部分的台灣人攏喝「m̄好！」八月二四暗，夏立言副主席kah中國海協會會長張志軍見面吃飯的時，有反映台灣民意，傳達台灣民眾對中國軍方佇台灣周邊海域連日軍演的不滿kah煩惱。張志軍應講：「阮採取的相關反制行動是捍衛國家主權kah領土完整、遏制打擊『台獨分裂kah外來干涉』的正義之舉。」夏立言大嘴開開、無應半句。按呢算作啥物「反映台灣民意」？！
有一工中國若「包圍打台灣」，借問一下，中國國民黨是beh「跪咧求和」？抑是beh kah台灣人民做夥《保衛大台灣》？