世界知名心臟醫學專家、美國kah歐洲頒受伊心臟學會院士、台大病院前院長李源德，九月二三，伊佇面冊寫的文，到十月底才大流傳，伊評論柯文哲「過去tú-tn̄g tio̍h機會hông提拔，賜伊機會，可惜伊能力有限。只好話講kah誠好聽、人激kah真古意。其實過去伊是一個鬧事之輩，本性難移。Chit-má kah以前仝款，使鬼弄蛇是伊的本事。」Koh評論柯文哲「家己想講是天賜的英才，佇我的學生中間，伊只不過是如此如此niā-niā。」「伊面皮厚，強beh假作伊上tio̍h，因為按呢誤tio̍h伊家己的人生。」李教授那像是看bē慣勢柯文哲定定kā外科醫生掛佇嘴邊，對外打扮作醫師菁英的形象。
今年九月初二，賴清德接受民視節目《新聞觀測站》訪問，節目主持人有特別邀請伊的恩師、bat擔當過國立成功大學醫學院附設病院院長的陳志鴻來訪問現場，陳院長大大謳咾賴清德「伊的人格特質值得信賴，伊有一粒溫暖的心，思慮沉穩koh有冷靜的頭殼，誠有同理心而且特別照顧弱勢族群，伊是一個值得信賴的國家領導人。」
今年五月二一下晡，「信賴台灣之友會」舉行彰化場成立大會，特別邀請民進黨主席賴清德佇成功大學醫學院讀冊的恩師—「秀傳病院」總裁、前立法委員黃明和來徛台。今年84歲的黃明和，回顧早前教書的時講，賴清德是真優秀的學生，伊mā講笑詼講「我m̄知影我的學生會作總統，若知我tio̍h會繼續教落去。」今仔日是信賴台灣之友會理事長何黎星邀請伊來，向大家介紹賴清德。1987年賴清德是伊的學生，當時伊佇成功大學教書，mā是立法委員，tio̍h ùi台北搭飛機去台南kā in上課。賴清德是啥款人？黃明和認為，賴清德是一個好學生，為tio̍h台灣的前途棄醫從政。黃明和講伊mā bat tī 1987年棄醫從政，去做立法委員，但是放棄了無完全，因為伊猶原koh轉去成功大學醫學院教冊、koh轉去病院看患者醫病；像賴清德chit款應該算是「上醫醫國」，伊無放棄醫療，伊是beh醫國家，是真正的好醫師，mā是上醫醫國上好的總統。
2012年十一月初五，成大病院前院長林炳文因為淋巴癌過身，下晡傳來消息的時，賴清德市長當佇議會備詢，伊後面猶有真濟行程無法度分身，請仝款成功大學醫學院出身的衛生局長林聖哲先去。第二早起透早七點，賴清德趕去病房，干單林院長娘、三個囝仔kah幾位學生佇hia。賴清德行入去病房，隨時向恩師的遺體跪落去。
賴清德m̄-nā得tio̍h先生的疼惜，伊mā知影感恩借情。柯文哲咧？