2016年一月十六，民進黨蔡英文當選總統，第一頭疼的問題是年金改革。逐個攏知影年金若無改革，各種年金會tī幾年內相續破產，到時會克虧tio̍h退休的軍公教人員領無錢。執政的民進黨拼勢tī 2017年六月二七立法院修正通過改革案，2018年七月開始實施。主要是公務員退休金18％優惠存款2年半歸零kah其他改革措施，hō͘真濟人損失錢財親像割tio̍h肉會疼。干單18%優惠存款部分tio̍h超過33萬外人受影響，一個家庭3個人來算tio̍h有100萬人會受氣。十一月二四全國九合一大選，中國國民黨利用chit點散播仇恨言論，引起真濟人怨恨執政的民進黨！大選的結果民進黨大輸：直轄市kah縣市長民進黨ùi現有的13席減kah chhun 6席，中國國民黨ùi 6席大大增加變15席。地方議會總席次，民進黨ùi 308席落到238席、失70席；中國國民黨ùi 374席增加到394席，加20席。中國國民黨非常得意in的仇恨言論誠有效。
食了知滋味，今年九合一大選，中國國民黨提bē出啥物好政見，干單想起四年前的phet步—仇恨言論，今年是製造人民對台北市長候選人陳時中的仇恨，演化作對執政民進黨的仇恨，ùi台北市thòaⁿ到全國。當猶未有疫苗咱tio̍h有準備錢，向世界各疫苗公司訂貨，因為中國的阻擾，各疫苗公司無beh出貨hō͘咱，hit時中國放聲講有疫苗會使賣咱，中國國民黨大細聲講tio̍h緊kā中國買。當時的衛福部長陳時中講若照兩岸條例不准向中國買賣醫藥kah疫苗，無先修法免講。中國國民黨罵講政治意識形態致使無beh接受中國疫苗。世界各國知影咱的處境，日本前後送咱420萬外劑AZ疫苗，美國前後送咱400萬劑Moderna疫苗，連波蘭、立陶宛、斯洛伐克、捷克mā送咱幾十萬劑疫苗。中國國民黨罵講咱台灣是「疫苗乞食」。
美國政府用超過180億美元資助藥廠研製Covid-19疫苗，tī短時間內研製出高效力疫苗；干單有疫苗無夠，美國政府koh投入32億美元研製抗病毒藥片。咱政府鼓勵本國藥廠研製疫苗，高端成功了，鼓勵逐家注高端疫苗。中國國民黨的仇恨言論講政府圖利廠商。造謠講政府買高端疫苗貴偌濟。連原本看起來誠正派的黃珊珊，竟然用「謀財害命」chiah惡毒的話來罵陳時中。
前幾工，日本Nagasaki Shinbun（「長崎新聞」）報導民進黨花蓮縣長候選人Kolas Yotaka參選新聞，講伊認為che是一場高舉原住民族認同而且kā自信chhōe轉來的運動。Kolas強調：「咱內心無仇恨，抵抵kah in倒反，咱是心肝底有愛。」善良的台灣人，咱無欠仇恨，勇敢拒絕藍白兩黨的仇恨言論。