九月二四，菲律賓當局對中國佇南海的黃岩島設置300公尺長的漂浮海上遮閘物（。），來宣示主權，驅趕菲律賓漁民，表達強烈不滿。因為按呢會阻擾tio̍h菲律賓漁民進入hit所在的合法掠魚權。除了強烈譴責中國的舉動，koh指控北京當局違反國際法。隔工，中國外交部發言人汪文斌強調，黃岩島是中國的固有領土，中國對黃岩島kah伊附近海域有無可爭辯的主權。九月二五，菲律賓海岸警衛隊tio̍h宣布已經kā中國佇黃岩島一帶設置的漂浮海上遮閘物拆除掉，這個舉動會hō͘中菲兩國kah南海的緊張情勢升溫。Che是由一名菲律賓海岸警衛隊的潛水員，佇南海水底割斷一段索仔，chit段索仔是中國軍隊設置的漂浮海上遮閘物的一部分。
菲律賓司法部長雷姆拉講：「Chiah-ê漂浮海上遮閘物確實佇hia，佇咱的專屬經濟區內，因為in侵犯tio̍h咱的專屬經濟區，咱有權kā伊拆除。」菲律賓國安會助理幹事馬拉亞講：「國際法kah海洋公約，寫kah非常清楚，咱有權利拆除掉中國海警隊所裝的chiah-ê漂浮海上遮閘物。」
Chit遍菲律賓對抗中國不斷擴大領土主張的行動，是按怎會chiah呢猛、chiah呢緊快咧？因為chiah-ê海域已經愈來愈接近菲律賓群島。上重要的是chit-ê行動是根據菲律賓總統小馬可仕的直接命令進行的。小馬可仕總統有表示，希望對中國採取koh khah強硬的外交政策。
中國講的「黃岩島」，是南海中沙群島的一個環礁。Chit-ê島離中國海南島500海里、離菲律賓蘇碧灣100海里。是中沙群島漲流（tiùⁿ-lâu）的時唯一露出水面的島礁。2012年北京掌控黃岩島，影響其他國家漁民的生計，2016年「海牙常設仲裁法院」仲裁庭一致裁定，佇《聯合國海洋法公約》下面，中國對南海自然資源無享有基於「九段線」的歷史性權利。仲裁庭koh認定中國佇南海的thiām海造陸「hō͘環境造成了不可挽回的損失」，要求中國停止佇南海的活動。判定黃岩島是包括菲律賓、中國、台灣kah越南幾個國家的傳統漁場。
九月二六，中國外交部發言人汪文斌對菲律賓表態講：「阮奉勸菲律賓m̄-thang無事惹事、製造事端。」伊講，索仔hông割斷了後、菲律賓kā固定索仔的錨（biâu）解除了後，中國mā已經kā遮閘物拆除了。奇怪，中國chit遍那會chiah好死？因為菲律賓chit遍的行動是小馬可仕總統直接下令的，真有可能有kah美國講好勢，中國若起腳動手，美軍有可能隨時插手。