三月初七，中國新任外交部長秦剛佇「全國兩會」外長記者會頂面頭一遍公開出面，強調台灣問題是中國核心利益中的核心、中美關係第一條bē-tàng跨過（hāⁿ-kòe）的紅線，伊專工the̍h出《中華人民共和國憲法》，引用「序言」講：「台灣是中華人民共和國神聖領土的一部分。完成統一祖國的大業，是包括台灣同胞在內的全中國人民的神聖職責。」堂堂一個外交部長、koh是頭一遍kah中外記者見面，mài the̍h hit部《中華人民共和國憲法》出來展寶，khah bē iàn-氣。咱那會按呢講咧？
1970年三月開始，中國teh討論憲法草案的過程中，毛澤東有幾遍提出廢除國家主席職務，遭受tio̍h包括林彪在內的真濟中央領導的反對。中央委員相續kā chit-ê行為準作「勸進」表忠的機會，1970年八月，中共中央廬山會議的時達到高潮，但是因為陳伯達倒台煞恬去。 此後，毛澤東的意見tio̍h佔嬴面，九屆二中全會tī 1970年九月初六形成一份「基本同意」的《中華人民共和國憲法修改草案》，其中除了有廢除國家主席職務以外，佇正文規定毛澤東「是我國無產階級專政的元首，是全國全軍的最高統帥」，林彪「是毛主席的親密戰友kah接班人，是全國全軍的副統帥」。
1971年九月十三，林彪kah in某葉群、後生林立果等幾人ùi秦皇島山海關機場坐飛機出走，所坐的256號三叉戟專機落佇蒙古人民共和國Ong-to-hàn，機頂9個人全部身亡。中國史稱作九一三事件，林彪隨時hông拍作反革命。第四屆全國人大籌備工作暫停，修憲進程中斷。1975年，第四屆全國人大通過的新憲法才正式kā有關林彪的字眼刪除掉。
全世界比較khah成樣的國家，絕對無可能會佇憲法頂面寫講某某人是某某人的親密戰友kah接班人。好得林彪摔死，若無，《中華人民共和國憲法》會變作世界憲法史上的一個大笑話。中國新任外長秦剛敢the̍h出《中華人民共和國憲法》引用「序言」講：「台灣是中華人民共和國神聖領土的一部分。」實在有夠m̄-bat字，硬kā兩個完全無仝款、兩個完全m̄-bat互相統治過的國家，寫入去憲法，講台灣是中國的。有一工中國強大起來，仝款佇憲法內底寫講蒙古是中國的，講越南是中國的，講中亞五國mā是中國的，甚至講一個kha̍h大的，講全世界攏是中國的！你mā m̄免感覺奇怪。
中華人民共和國自從1949年十月初一建國以來，台灣kah中國一直是「田無溝，水無流，」雙方完全無關係。Mài按呢食飽閒閒煉siáu話，無營養！
(230317)