前總統馬英九若無講話，驚hông講伊是啞口，所以久久仔tio̍h會講一個笑話。馬英九的笑話是講：舊年國慶典禮上，蔡英文總統提出「中華民國kah中華人民共和國」互不隸屬，是無必要的挑釁（hùn）起空，koh-khah是違反中華民國憲法。九月二八，馬英九出席「兩岸交流35年回顧kah展望座談會」的時，伊按呢講的。馬英九質疑，蔡英文無看過中華民國憲法增修條文、講的是空話，若是互相不隸屬真正實現，tio̍h會變成兩個中國。
九月二九，陸委會回應講，中華民國是主權獨立國家，政府依據《中華民國憲法》治理國家，kah中華人民共和國互不隸屬，《中華民國憲法》kah《增修條文》所有條文掀透透，chhōe無中華民國隸屬世界上任何一個國家。
十月初二，中國國民黨台北市長參選人蔣萬安舉辦文山區後援會成立大會，前台北市長郝龍斌、馬英九等一陣人攏有到場徛台。馬英九koh再質疑蔡英文提出兩岸互相不隸屬，根本是無看過中華民國憲法增修條文，增修條文講台灣kah中國攏是中華民國，大陸地區是台、澎、金馬以外的中華民國領土，chiah-ê領土佇憲法上猶原是咱的領土，但是佇中國憲法中，台灣是中國的。馬英九講歸晡，敢有講到底叼一國隷屬叼一國，無。伊才是teh講空話。
2015年十一月初七，馬英九以中華民國總統身份、習近平以中華人民共和國主席身份，人稱呼作「兩岸領導人會面」佇新加坡舉行會談。無管是公開抑是私底下，當時的馬英九總統敢有kā習近平主席講清楚：根據阮中華民國的憲法增修條文，恁中國大陸地區是台、澎、金馬以外的中華民國領土？若是照新聞報導來看，無論公開抑是私底下，馬英九是攏無講。按呢，一個代表中華民國，一個代表中華人民共和國，in兩個頭人公開表演兩個亙不隸屬的國家，敢m̄是真正實現tio̍h兩個中國咧？
無管中國以大規模軍演恫嚇台灣、破壞台海和平的時，mā無管國內反對聲浪，八月中，中國國民黨副主席夏立言猶原chhōa團去中國，kah中國國台辦副主任陳元豐、海協會長張志軍見面。月外日後的十月初三，夏立言公開表示，伊是唯一一個敢公開佇中國官員面前表達中國對台軍演不滿的人。夏立言講，伊kā對岸官員講「90%台灣人不滿中國對台軍演，對軍演感覺bē爽，感覺煩惱」。真失禮，講作你講，中國完全無teh kā伊信到。照常軍演。夏立言tio̍h是想講台灣、中國亙不隸屬，m̄才會按呢ta-ta叫。
台灣、中國，亙不隸屬，馬英九講是違憲！笑破人的嘴。