四月初一是戇人節，有真濟戇人利用chit工講戇話騙戇人。台灣人誠好，m̄免一定tī戇人節，歸年thàng天逐工都會使講戇話，戇人講戇戇的戇話，巧人講那像巧巧的戇話。加減聽，有消氣化痰的功效。Chit句話當然mā是戇話。
二月十四，鴻海創辦人郭台銘去拜會前立法院長王金平，吐露四冬前伊退黨是「年輕氣盛、一時衝動」，希望會tàng轉去中國國民黨，代表中國國民黨參選2024。人講「人生七十古來稀」，1950年出世的郭董。四冬前差一歲tio̍h進入「古來稀」的境界，離「年輕氣盛」那像有一節仔。
二月十五，中國國民黨立法院黨團總召曾銘宗建議，chit遍總統提名mài辦初選，因為初選衍生後遺症，不利整合。古早有人講仝款的戇話，講有人食飯骾死去，tio̍h叫人m̄-thang食飯。咱假那無聽講有人因為驚骾死煞m̄敢食飯。Khah趣味的是，三月二一，中國國民黨主席朱立倫真正宣布，chit遍總統選舉提名採取徵召，無beh辦理初選。早前有表態beh參加中國國民黨總統初選的孫文學校總校長張亞中表示遺憾，批評「堂堂一個大黨連初選都m̄敢辦」。
二月十六，陸軍司令部證實，東引地區指揮部發現空中不明物體飄落，而且佇靶場拾tio̍h氣球殘體，初判是氣象探測儀器，球體直徑約一公尺，儀器盒頂面標有簡體字，引發國安疑慮。對chit件代誌，二月十七，金門縣中國國民黨立法委員陳玉珍表示，證明金馬kah大陸的距離真近。講tio̍h那像若無發生chit件代誌，無人會tàng證明「金馬kah大陸的距離真近。」
三月二四，是中國國民黨台北市3個選區一階段立委提名登記最後一工，台北市議員徐巧芯完成登記了後講，上好的方式是伊入去國會，kah伊仝選區的現任立委費鴻泰入去不分區名單抑是進入2024年內閣。伊講，世代交替m̄是beh giú啥人落來，是beh hō͘ chiah-ê資深委員向頂懸發展、有koh khah好的舞台。三月二七，現任立委費鴻泰認為中國國民黨猶未得tio̍h執政tio̍h分派官位無好。徐巧芯議員二七下晡顚倒問講，敢講費委員對中國國民黨2024年執政無信心？咱beh請教對中國國民黨2024年執政有信心的徐議員，2024年總統、行政院長kah各部會主管，m̄知按怎拍派？
三月三十，前總統馬英九參訪中國武漢市檔案館，大大謳咾中國防疫成果無大幅向外擴張，是「對人類的貢獻」。中央流行疫情指揮中心指揮官王必勝感慨講：「我m̄知影貢獻點佇叼位？我干單知影he是人類的大災難！」
咱真歡喜，台灣人有講戇話的自由。