五十幾冬前，我佇台灣第一間美國廣告公司上班。阮真濟客戶是美國佇台灣的分公司。廣告公司原本tio̍h有責任幫助客戶佇新聞媒體發表消息。外國客戶除了要求佇中文媒體發佈公司各種消息以外，當然希望會tàng佇“China Post”kah“ China News”當時兩份英文報紙發佈新聞稿。阮頭家秦凱先生美國留學的，伊kah逐間美國公司的負責人討論代誌、開會抑是報告歸年的廣告計畫攏無問題。但是阮公司有倩一位美國老師每工來公司一chōa，阮kā寫好的中文新聞稿用英語解說hō͘伊聽，伊才寫作英文新聞稿交hō͘阮頭家秦凱先生過目。我bat問秦先生，是按怎你無愛家己寫咧？伊笑笑仔講，咱寫的台灣英語有時會寫了無tio̍h味，外國公司的英文新聞稿m̄-nā台灣的美國頭家會看，大部分攏會寄轉去美國總公司。若是寫了無好勢，m̄-nā咱公司的面子無了了，甚至台灣的面子mā掃地。我有一遍kah hit位美國老師話仙，伊笑講，伊足佩服台灣學生。伊講伊有指導幾個大學畢業生英文寫作，in寫的無一位是有英文文法的錯誤，但是歸篇文讀起來m̄是英語，因為阮美國人無人按呢講，你按呢講無人知影你teh講啥，而且真濟用語是有美國文化的背景kah習慣用法，你若想講照字典的解說用chit字chit句tio̍h無問題，往往會引起誤會甚至惹出大代誌。
半世紀過了，猶原有人犯tio̍h台灣英語的錯誤，真可惜。
七月底，民眾黨的英文官網推出選戰標語“VOTE WHITE，VOTE RIGHT”，伊的意思應該是講：「票投白色力量，票投正確的人」。若是干單寫中文，當然無問題。但是英文官網寫英文標語，tio̍h愛考慮美國文化背景。七月三十下晡，駐台美國籍自由記者赫爾（Erin Hale）佇Twitter發文講，民眾黨的口號kah美國「白人至上主義政黨」的口號差不多仝款。赫爾表示，伊了解台灣政黨定定用色作代表，像講「藍色」kah「綠色」，伊mā會tàng理解台灣民眾黨chit-ê案例。但是chit-ê口號對美國人來講猶原有khah敏感。赫爾提起1958年創立的「美國白人至上主義政黨」，in tī競選hit當時的口號tio̍h是“VOTE RIGHT，VOTE WHITE，VOTE STATES' RIGHTS”In已經tī 1987年解散。網紅團體「百靈果NEWS」佇面冊頂面發文，指民眾黨佇英文官網推出選戰標語“VOTE WHITE，VOTE RIGHT”，對民眾黨無熟似的外國人來講，真容易誤解作「票投白人，票投右派」。Chit句英文標語美國「三K黨」的色彩傷明。
民眾黨已經kā chit句英文標語the̍h掉，柯文哲chit-má才知影原來有「文化差異」。後知後覺總是比不知不覺有khah好。