2022年九合一大選，中國國民黨蔣萬安當選台北市長，辭掉立法委員了後，台北市第三選區（南松山kah中山區）的立法委員tio̍h補選。抵抵佇第三選區（松山信義區）以兩萬外票高票當選的中國國民黨市議員王鴻薇宣布，伊beh參選2023年一月初八的立委補選、而且mā去登記了。伊哮講人罵伊「落跑」。敢無影？M̄-nā按呢，伊猶原beh參加十二月二五台北市議員宣誓就職，koh beh投票選議長、副議長，伊若立委補選落選猶會使轉去作市議員。
干單風聲吳怡農有可能代表民進黨出來參選，一向用謠言散布仇恨言論的中國國民黨，隨時散布謠言講：吳怡農是「政二代」，意思是講伊無本事，是靠伊的父母致蔭的。現此時台灣真正的「政二代」滿滿是，並m̄是啥物見笑的代誌，問題是吳怡農m̄是「政二代」，伊的老父吳乃德是芝加哥大學政治學博士，中央研究院政治社會所退休研究員。硬kā「政治學者第二代」講作「政二代」，會hông笑「無常識」。猶有一個謠言koh Khah「無常識」：講吳怡農kah烏道有關係、是「黑道小弟」。吳怡農真受氣講，按呢造謠言的人是目睭金金人傷重！伊講我身邊無烏道，但是熟似真濟早前受中國國民黨迫害的「黑名單」的人。事實是吳怡農1980佇美國芝加哥出世，六歲歸家轉來台灣，高中才去美國求學，耶魯大學經濟學系畢業了後，入去高盛集團工作。2013年選擇放棄美國國籍、離開金融業轉來台灣，2014至2015年佇海軍陸戰隊服役。服役了後bat擔任過民進黨台北市黨部主委。若講烏道，啥人敢kah中國國民黨比？Mai講伊的黨史烏mà-mà看無伊的青天白日黨徽，現此時台灣政壇，有烏底的縣市議員、議長副議長的中國國民黨員，用幾個人雙手手指頭仔來算mā算bē完，中國國民黨敢烏白造謠講吳怡農kah烏道有關係？M̄驚笑破人的嘴！
王鴻薇講beh邀請吳怡農辯論，吳怡農講：「無政見是beh ùi叼位辯起？」一聲kā彈倒轉去。按呢to̍h-tio̍h！王鴻薇koh講che、koh講he。吳怡農koh講：「照我標準來看，chiah-ê攏m̄是政見。王鴻薇那像猶m̄知影立法委員是beh做啥物。」有記者直直問講那會無beh接受王鴻薇辯論戰帖？吳怡農直剖講：
辯論是針對實質政見有具體的主張，ùi選舉到taⁿ干單看tio̍h王鴻薇噴嘴瀾kah烏白罵人，無必要辯論hō͘伊koh利用機會抺烏、噴嘴瀾罵人。
吳怡農抵tio̍h chit款彎彎曲曲（khiau）的中國國民黨，若kah伊li-lí lo-lo，tio̍h會hō͘伊牽去se̍h。吳怡農按呢kah伊直球對決，當然是tio̍h mā才會選贏！