三月二九，蔡英文總統chhōa團展開10天的「民主同伴共榮之旅」。專程拜訪中美洲友邦瓜地馬拉kah貝里斯，四月初七，圓滿結朿旅程轉來到台灣。
蔡總統有分別kah瓜地馬拉kah貝里斯兩國簽署合作協定，向望kah友邦佇醫衛、經貿以及基礎建設等領域攏會tàng持續深化合作。
去程過境紐約期間，美東時間三十暗，蔡英文總統受邀請出席美國「哈德遜研究所」舉辦的晚會，接受「全球領導力獎」，有kah美國眾議院民主黨領袖傑福瑞斯見面會談，另外koh kah美國參議院3位跨黨派參議員見面。回程過境美國洛杉磯，美西時間初五早起kah美國眾議院議長麥卡錫會談。雖然ùi 1994年到taⁿ台灣總統有29遍過境美國，chit遍是台灣總統頭一遍佇美國本土會見美國政壇第3號人物眾議院議長。麥卡錫議長kah蔡英文總統佇雷根圖書館見面的時，包括麥卡錫本人在內，總共有18位民主黨kah共和黨議員參加。
四月初六、蔡英文總統轉來到台灣的前一工，美國聯邦眾議院外交委員會主席麥考爾tio̍h飛來台灣，che是《台灣關係法》生效44年以來，頭一遍有美國國會外交委員會訪問團公開來台灣。Chit遍訪問團成員四位共和黨、四位民主黨，攏總有8位外交委員會kah印太小組眾議員。
咱注意tio̍h美國人的行動，無論是佇紐約kah美國眾議院民主黨領袖傑福瑞斯見面會談，抑是kah美國參議院3位參議員見面，in是跨黨派；佇洛杉磯kah美國眾議院議長麥卡錫會談，18位眾議員參加，民主黨kah共和黨差不多各一半；抑是美國聯邦眾議院外交委員會主席麥考爾chhōa團來台灣訪問的八位外交委員會kah印太小組眾議員，兩黨攏有。蔡總統chhōa團展開的「民主同伴共榮之旅」，總統府有照慣例，協請立法院邀請各黨團委員參與總統chit遍出訪行程。原本府方安排4位立委，朝野每個黨團一位，真遺憾中國國民黨無派立委隨行，最後由民進黨團派陳歐珀、陳明文2位，民眾黨團派邱臣遠，時力黨團派王婉諭隨行。你看中國國民黨實在有夠m̄-bat字！
蔡總統轉來台灣第二工，中國以蔡總統出訪邦交國kah過境美國作藉口，四月初八至初十，三工佇台灣周邊進行大規模軍演，「山東號」航空母艦佇台灣東部400公里外海域作戰機起落演習，一工上濟有91隻次中國軍機kah 9隻船越過台灣海峽中線來擾亂。四月十一，立法院朝野黨團佇院會代表台灣2,300萬人民，向中國當局表達嚴正譴責kah抗議，而且要求中國當局隨時停止對咱國的武力恫嚇。Chit遍中國國民黨團有簽字。Tio̍h，按呢才是行正路。
因為國防kah外交是全民的代誌，bē使分黨派！