台北市中山區大直街94巷「基泰大直」建案，因為施工不良，造成九月初七暗，隔壁7棟民宅受損pit裂、嚴重歪斜，有一棟lap陷、一樓變作地下室。
一直到九月初九中晝，基泰建設公司攏無出面對外說明。台北市副市長李四川佇現場指出，災害的最大責任佇建商，應該負全部責任。初七暗到taⁿ一直拍電話攏chhōe無基泰建設總經理。伊譴責基泰高層m̄敢為chit件代誌負責。過兩工，基泰總經理馮先勉辯解講，初七暗伊有趕到現場，mā遠遠有看tio̍h李四川副市長。愈講愈離譜！初七暗伊佇現場有看tio̍h李副市長來，是按怎免過來相借問，來kah李副市長參詳按怎做善後工作khah好勢咧？莫名其妙！
九月初十下晡三點，基泰建設佇「證交所」召開記者會，董事長陳世銘表示伊會負起所有責任、絕對bē推卸，所有的責任伊一個肩頭完全來擔。五分鐘後伊宣佈辭掉董事長。按呢是beh按怎擔責任咧？莫名其妙！
台北市政府都發局表示，三月初八kah十三，分別有接tio̍h民眾經由市民熱線1999陳情鄰損，都發局有請工地先kah民眾聯繫協商。台北市政府建管處mā坦白講，住戶有tī 四月、五月書面陳情。建管處有請承造、監造kah專業人員到現場勘查，但是當時了解並無直接關聯。七月初六台北市都發局koh函覆陳情住戶的公文，判定「會勘標的無危害公共安全之虞」，所以建築工程會使繼續施工、本局無beh列管。那會按呢？台北市議員許淑華表示，以往台北市若發生類似鄰損爭議，攏是由都發局會同受災戶、建商kah監造人共同勘查損害情形，但是前市長柯文哲任內家己濫摻修改鄰損鑑定規範，干單需要通知建商kah監造人「自行製作初步安全認定書」kah「損害責任歸屬初步認定書」，而且建商若判定建物無受損tio̍h會使繼續施工，甚至若判斷受損kah施工無關係，都發局tioh bē去列管。Che tio̍h是外界所質疑的建商球員兼裁判，mā是chit遍大直民宅lap陷的原因之一。原本好好的法規，柯文哲前市長那會按呢去改咧？莫名其妙！
若是有任何官員去到現場，一定會看tio̍h住戶佇每一棟樓腳大門貼的紙條：「請注意！近期因為基泰建設施工，致使本排公寓一樓住戶的室內、室外壁面已經出現pit裂、壁面kah樓梯之間mā出現pit痕、mā因為建物歪斜室內的門bē關得。」無一個官員踏腳到，竟然敢空嘴哺舌講災情kah工地挖地下室無直接關聯。莫名其妙！
Ai，無想講大直民宅lap陷，會lap出一堆莫名其妙！