總統副總統大選民調封關前，民眾黨的內參民調，調整後柯盈配33.4%，賴蕭配33.79%，侯康配32.8%。Tī選前柯文哲唱聲「選後我才來一個一個對！到時tio̍h知影啥人teh做假民調？」一月十六暗，選輸的民眾黨主席柯文哲佇面冊向支持者保證「選前民眾黨內參民調無作假」。手機加市話民調誤差會hiah呢大是因為少年人攏無出來投票。「少年族群投票率愈高，tio̍h會kah阮的民調結果koh khah接近。但是chit遍投票率干單七成一，致使結果不如預期。」少年人無出來投票，柯文哲怪講真濟少年人tio̍h上班。柯文哲可能m̄知影，2020年總統大選蔡英文得歷史上最懸的817萬外票，投票率mā才七成四niā-niā。
柯文哲認為選輸是因為「無法度阻絕棄保」，「以封關民調來看，大多數的民調攏kā我的支持度壓低。而且是長期刁工打壓，來營造棄保效應。」加上各種突發事件，像講國家級警報、民調封關了後真濟方面違規釋出民調，甚至有假冒郭台銘董事長之名的批信流傳，mā攏有可能影響選民的投票意願。
柯文哲檢討台灣的投票制度落伍，一直無法度推動網路kah不在籍投票，hō͘真濟人喪失公民權益，續落來台灣民眾黨新任8名立委，會督促中選會加強數位化，避免人為失誤。」柯文哲可能m̄知影，ùi 2007年至2022年之間，有荷蘭、德國、愛爾蘭、英國、芬蘭、日本等六個先進國家，因為保安、法律、財政kah技術問題相續放棄電子投票，挪威kah澳州新南威爾斯州兩國放棄網上投票。有不在籍投票的美國，2020年投票率才66%。學者認為不在籍投票恐驚引發中國介選，電子投票有hông操控等資安疑慮，mā有可能受駭客干擾。
柯文哲夫人陳佩琪檢討選輸關鍵是：掖錢kah縛柱仔腳的本領實在輸人。
一月十三暗，中國國民黨智庫副執行長凌濤直剖，民眾黨總統競選總幹事黃珊珊用民眾黨假民調，是藍白破局、無法度kā民進黨趕落台的罪魁禍首。
一月十七，中國國民黨副總統候選人趙少康檢討伊的總統候選人侯友宜口才無好koh bē曉講煽動人感情的話，柯文哲tio̍h真gâu。Ùi某一個角度來看，侯友宜是挑戰者，若無當選啥都無，所以tio̍h愛hō͘選民一寡希望，選舉是一種財富再分配，弱勢者khah濟票，tio̍h愛tī選舉的時對弱勢者講一寡承諾，若m̄敢講承諾tio̍h會真歹選。趙少康koh講，「我早tio̍h講柯文哲是第三，結果證明tio̍h是按呢。不合作tio̍h是落選，你講尊重科學、數據，m̄是憑家己亂講，結果tio̍h是你無尊重科學、數據，才會hō͘民進黨總統當選人賴清德繼續做。」
大選後檢討，第一流的落選者當然是檢討別人！