日本學者、東京外國語大學Ogasa-wara Yoshi-yuki（小笠原欣幸）教授， tī 2020年總統大選的時，預測蔡英文總統得票率57.7%，kah實際得票率57.1%干單差0.6%，準kah會hông驚tio̍h。一位算命先算kah足準，咱會尊稱伊叫作「半仙」，若是按呢Ogasa-wara教授會堪得尊稱作「3/4仙」。今年十月二六，chit位Ogasa-wara教授佇面冊頂面預測今年台灣九合一大選結果，22縣市長選舉：民進黨5席、國民黨15席、民眾黨1席、無黨籍1席。甚至kā每一個縣市長當選名單攏列出來。當時有真濟人講Ogasa-wara教授chit遍無準ah！真歹勢，30工後的十一月二六選舉結果，除了嘉義市長延後選舉以外，所有的縣市長當選名單kah伊預測的完全仝款，一點仔精差都無。
Chit遍選輸的民進黨tio̍h有需要用心栽培chit款的「選舉精算師」，tī平時tio̍h無停做每一個縣市人民對各政黨的支持度，會tàng研究出每一個縣市長期間的變化。第二，需要栽培會曉診斷各種政治病症的病理師，研究出每一縣市的問題出佇叼位。第三，需要栽培會曉開藥方的醫師。免幾年，保證民進黨會tnàg kā全國每一個縣市治理好。咱用chit遍選舉的結果來做檢討。
做了非常好連任的縣市長，chit遍bē-tang koh參選，伊所推薦掛保證的候選人，照理講應該會得tio̍h縣民抑是市民的支持才tio̍h，那會親像屏東縣長潘孟安所推薦的立法委員周春米才贏萬外票niā-niā，koh khah奇怪的是，基隡市長林右昌推薦的立法委員蔡適應、桃園市長鄭文燦推薦的立法委員鄭運鵬、新竹市長林志堅推薦伊的副市長沈慧虹，m̄-nā攏總落選，而且票差真濟。Che是啥物道理？Hō͘人想無。
Chit遍選舉，有真濟位縣市長kah縣市議員候選人，延續2018年的仇恨言論、烏白罵人的攏總高票當選。按呢，會hō͘ chit種人得意kah誤會講散播仇恨言論、烏白罵人實在真好用。民進黨中央tio̍h好好研究解毒的藥方，佇善良的台灣土地頂面實在m̄好koh散播仇恨言論。Che是真嚴重的污染！
Chit遍選舉，台中市長盧秀燕、雲林縣長張麗善、宜蘭縣長林姿妙、花運縣長徐榛蔚、台東縣長饒慶鈴五位女性的中國國民黨縣市長攏拼連任，其中有做了誠好的，有做了普通的，有做了真差的，但是每一位攏總高票當選，大贏民進黨對手贏kah有thang好賣。到底是啥物原因？