海外旅遊真濟台灣人會選擇去日本，原因是「安全」。治安的安全、交通的安全、食物的安全、種種的安全。無論你beh去叼一國旅遊，一定tio̍h愛會記得孔子公講的話：「危邦不入」（gûi-pang putji̍p）意思是講，危險的所在m̄好去。啥物所在危險？有戰爭暴亂無安定的所在；有大風颱、苦旱、大地動、淹大水各種天災天變的所在；另外是有某種傳染病大流行的所在。
五月十九，中國國台辦發言人馬曉光講，向有關主管部門了解，ùi今仔日起，恢復旅行社經營台灣居民來大陸團旅遊業務。伊講：「熱誠歡迎台灣同胞來大陸旅遊觀光，遊覽大好河山。」對chit點，交通部觀光局長張錫聰隨時回應講，咱希望雙向同步開放m̄是單面，而且tio̍h透過「小兩會」協商，開放牽涉tio̍h對等原則，由陸委會照整體情勢因素檢討評估，目前禁止旅行業者接待kah組團前往對岸的「禁團令」猶未解除。陸委會發言人詹志宏強調，因為受tio̍h疫情影響，全世界觀光旅遊暫停幾仔年，兩岸mā仝款，若beh重新恢復，真濟代誌tio̍h談，「m̄是任何一旁宣布明仔載來開放，無hiah呢簡單。」
優質旅遊協會理事長李奇嶽徛佇旅遊業的立場認為，「疫情進前的2019年，台灣人一年出境差不多有1,700萬人次，有四百外萬人次是去中國大陸，業者的心態來講，希望佇兩岸交流頂面tio̍h加一寡交流，減一寡政治干擾。」
咱干單講tio̍h考慮安全，旅遊若無安全，啥物攏免講！Tio̍h是孔子公所講的，危險的所在m̄好去。
2022年十二月二七，中國宣布防疫大解封，2023年一月初八開放邊境管制。短短一個月內，ùi上蓋嚴格的動態清零，到原地倒平，無koh再通報確診個案數，mā kā「新冠肺炎」改名作「新冠感染」。按呢「新冠肺炎」tio̍h會佇中國無去是boh？當然是無可能！
五月二二，中國科學院院士鍾南山tī「2023大灣區科學論壇」表示，已經預測「新冠感染」XBB變異株會佇中國koh發燒，五月底上高峰感染人數每禮拜4,000萬人，六月底一禮拜會達到約6,500萬人。咱算五月底一禮拜加六月的三禮拜，平均每禮拜4,000萬人，tio̍h有1億6,000萬人，六月底一禮拜加七月初一禮拜，兩禮拜tio̍h有1億3,000萬人，鬥起來tio̍h有2億9,000 萬人。五月底以前的三禮拜kah七月初以後的三禮拜攏無算，tioh有chiah濟人確診的國家敢無算是危險的所在？為tio̍h台灣人的安全，咱無應該組團抑是個人去中國旅遊，同時mā無應該開放中國旅行團抑是個人來台灣旅遊。